Meghalaya Games: Kmen u MLA Jowai halor ki kabu ia ki nongialehkai namar ka jingkyrshan ka Sorkar

Syllad | The Rising MeghalayaJanuary 20, 2025

U MLA Jowai bad Chairman ka MUDA u Bah Wailadmiki Shylla u la pynpaw ka jingkmen halor ki lad ki kabu ba la ioh da ki nongialehkai kiba wan iashim bynta ha ka lympung ialehkai 6th Meghalaya Games ka ban sdang naduh 20 tarik ha Jowai, West Jaintia Hills District lyngba ka jingkyrshan borbah jong ka Sorkar Jylla.

Ia kane u MLA u la pynpaw ha ka jingialang kaba la long ha ka 19 tarik Kyllalyngkot ha phyllaw indoor hall jong U Kiang Nangbah Stadium ha ka jingiadon lang u Deputy Commissioner, West Jaintia Hills uba bat ruh kum u President ka West Jaintia Hills District Sports Association (WJDSA) u Bah BS Sohliya, DSO Bah Khroobok Passah, Working President EMH Passah nalor ki heh na ka WJDSA.

Na ka liang u MLA u la kyntu ruh ia ki nongialehkai ba kin pynleit jingmut ha ka jingiatreilang bad ka jingiatylli, kata da kaba iai ban ba ka jingkyrshan lang iwei ia iwei kum ka kynhun ka long kaba kongsan na ka bynta ka jingjop. U la pynshlur ruh ia kiba wan iashim bynta ba ym tang ba kin khur medal hynrei ruh ban jop ia ki mynsiem briew, kata da kaba kdewruh halor ka jingkongsan jong ki jingtei ba la pynbit pynbiang da ka sorkar jylla na ka bynta ka jingkyntiew jong ka Association halor ka roi ka par ha ki kam ialehkai sports.

U Bah Wailadmiki u la pynkynmaw ruh ia kaei kaba u la mad ia lade ha kaba iashim bynta ha ka lympung ialehkai National Level basketball na ka bynta arsien kynthih.

Ha kane lympung Meghalaya Games baroh ki don haduh 395 ngut ki nongiashim bynta, kynthup ia 43 ngut ki nongpyniaid bad 352 ngut ki nongialehkai, ha kaba ka West Jaintia Hills ka wan ba ar na baroh ki 12 tylli ki district ha ka jingdon bun eh ki nongiashim bynta ki ban iashim bynta ha ki 29 tylli ki jait jingialehkai ne discipline bapher bapher.

Ha kane ka sngi la ai ka jingkitbok kitrwiang ia baroh ki nongialehkai ka district ba kin lah ban ialehkai bha bad wanrah iaka nam ka burom ka district.