Meghalaya Games: Pynpaw ka Diva Tang ia ka sap ha ka table tennis, khur 3 ki takma ksiar

Syllad | The Rising MeghalayaJanuary 23, 2025

Ka samla Diva Tang na West Jaintia Hills ka la lah ban pynpaw ia ka sap kaba kyrpang ha ka jingialehkai Table Tennis jong ka lympung 6th Meghalaya Games haka 22 tarik Kyllalyngkot ha kaba ka la ioh ban khur haduh laitylli ki takma ksiar, kata ha ka jingiakhun ha ka thup Mixed Doubles ha ryngkat u paralok u Eraphel Dkhar, Womens’ Double ha ryngkat ka Medaihunlang Swer bad ha ka jingiakhun ba marwei (Solo).

Ka jingjop ha kine ki jingiakhun paralok ka long ruh khamtam namar ka jingtbit ka jong ka Diva Tang kaba la shah jied ruh kum ka ‘Best Women Player’ ha ka table tennis ha kane ka lympung. Kane ka jingnoh synniang borbah ka jong ka, ka la iarap ruh ban kyntiew ha kaba iadei bad ka jingioh khur takma jong ka West Jaintia Hills District.

Ha ka jingialehkai table tennis ka West Jaintia Hills ka la ioh khur laitylli ki takma ksiar, bud sa ka East Khasi Hills kaba la ioh artylli ki takma ksiar.

Ha ka liang ki shynrang, u Rituraj Shabong na East Khasi Hills u la ioh ia ka nam Best Men Player da kaba ioh khur ia ka takma ksiar ha ka jingialehkai Men’s Singles category kumjuh ka jingjop haka Men’s Doubles bad Mixed Doubles.

Ha ka Mixed Doubles u Rituraj Shabong u la iakhun ha ryngkat u Merryzone Wanniang bad ioh khur ia ka takma rupa na ka bynta ka Eas Khasi Hills. Kumjuh ha Men’s Doubles u Shabong u la iakhun ha ryngkat u Banekhupar Sancley ban jop ia ka takma ksiar kaba la pynlong ruh ia u ba un shah jied kum u nongialehkai ba tbit tam.

Kiwei pat kiba jop ha ka liang ki shynrang ki kynthup ia u Chesan Marak na West Garo Hills, uba la ioh ia ka takma rupa ha ka Men’s Singles bad u Paban Kanta Kanwar na East Khasi Hills, uba la ioh ia ka takma rnong.

Ha ka Men’s Doubles, u Gilbert Sohtun bad u Roy Nongbri na East Khasi Hills ki la ioh khur ia ka takma rupa katba u Paban Kanta Kanwar bad u Labeeb Faisal Ahmed na East Khasi Hills ki la ioh rah ia ka takma rnong.