Meghalaya State League: Ka Mawlai pyrshah iaka Ladthadlaboh haka semifinal ba nyngkong

Syllad | The Rising MeghalayaJanuary 26, 2025

Ka rynsan ka la long kaba la pynkhreh ia ka kynhun ialehkai ka Mawlai Sports Club bad ka Ladthalaboh Sports Club, ba kin wan ban ia mih madan ban iakhun ia ka semifinal ba nyngkong ka lympung bah ialehkai phutbol ka jylla, ka Meghalaya State League, ka Meghalaya Football Association (MFA), ba la iarap ban kyrshan ia ka da ka tnat Sports ka sorkar jylla.

Kane ka jingiakhun kan long ha ka 27 tarik Kyllalyngkot ha ka por 4:30 nohphai sngi, ha SSA Stadium, First Ground, Polo.

Ka jingdie paidbah ia ki ticket naka bynta kane ka jingiakhun kan long 50 tyngka bad 100 tyngka ia ka bynta ka VIP Gallery, ia kaba lah ban thied na ki jaka die tiket ba don ha kane ka stadium.

Ka Mawlai, ka la juh rung teng shaduh ka kyrdan iakhun ka semifinal jong ka MSL, katta ha u snem 2023 ha shwa ba kan shah liem noh hakhmat ka kynhun ialehkai ka Khliehmawlieh, kaba ha kane ka kynti iakhun kaba mynta, ka Mawlai ka la ioh ban shim ia ka kput kylli ban pynliem ia ka Khliehmawlieh ha ka jingiakhun ia ka quaterfinal.

Lada ia phai pat sha ka kynhun ialehkai jong ka Ladthalaboh, ka kynhun ialehkai kaba dei na West Jaintia Hills District, la khmih lynti ba kan iakhun tyngeh bad ruh ban kynjoh sha ka thong.

Ka lynti ia ka Ladthalaboh ban jam sha ka kyrdan iakhun ka semifinal, ka la wan hadien ba ka la pynliem da 5-2 ia ka  Sutnga ha ka por ba la iakhun ia ka quarterfinal.

Ka ban kham ai mynsiem ia ka Ladthalaboh ha ka jingiakhun pyrshah ia ka Mawlai kan shong ruh ha ka jinglah ban wan ban kyrshan bad ai mynsiem ki paidbah nongkyrshan ki jong ka.

Ka jingiakhun ia ka semifinal kaba ar la buh ban long ha ka 28 tarik Kyllalyngkot haka por 1:30 nohphai sngi ha Wahiajer, ha kaba ka Shillong Lajong FC kan hiar ban iakhun pyrshah ia ka Rymbai Shkenshynriah.

Ka Shillong Lajong kaba la rah ia ka nam kum ka lahduh ha u snem 2023, mynta ka kynti ka la lah ba kan pynliem ia ka Rangdajied United FC da 3-1 ha ka por ka jingiakhun ia ka quarterfinal, katba ka kynhun ialehkai ka Shkenshynriah ka la jam sha kane ka kyrdan hadien ba ka la pynliem da 2-0 ia ka Chipakkore, ka jingiakhun ba la long ha Tura.