Mih jyndat ka liang pyrshah na iingdorbar thaw aiñ ba pynkheiñ ia ka rukom pyniaid dorbar

Syllad | The Rising MeghalayaFebruary 27, 2024

Ka Liang Pyrshah hapoh ka iingdorbar thaw ain ka jylla haka 27 Tarik Rymphang kala mih jyndat napoh ka dorbar mang tyngka kum ka dak ban pyrshah halor ka jingpynkhein ia ki kyndon ne rule kiba iadei bad ka rukom pyniaid dorbar, kata hashwa ba u Myntri Rangbah ka jylla uba khmih ia ka Tnat pla tyngka un ai ia ka jubab halor ka jingiatai ia ka mang tyngka.

Kane ka la wan long ruh hadien ba u nongmihkhmat liang pyrshah ka Congress napoh Umsning u Dr. Celestine Lyngdoh ha kane ka sngi kut jong ka dorbar mang tyngka u la wanrah ia ka point of order ba ka voting on demand for grant kaba la dep leh ha ka sngi Thohdieng ka dei na ka bynta ka supplementary demand ka dei kaba bakla namar ia ka supplementary demand la dep leh naduh ka 21 tarik Rymphang.

“Lada ngi ong ba ka voting for demand for grants lah ban leh hashwa ka jubab na u Myntri pla tyngka, kumta ruh ka jubab jong une u Myntri ha kaba kut jong ka jingiatai halor ka mang tyngka kam don jingmut shuh,” u la ong da kaba bynrap bad ong, “Nga kwah ba kane ka iing kan bud ia ki kyndon.Lada ka iing kam bud ia ki kyndon kan ym don jingmut ia ngi ban sngap.”

Na ka liang u Dr Celestine u la kyrpad ia u Lamphang ne Speaker ban weng noh ia ki kyntien kiba u la pyndonkam ba ki la shu pynsyrwa kai ia ka por bad ban pynbeit ia kane ka jingkren kaba ialam bakla jong u CM uba la ong ba ka sngi Thohdieng ka dei  kaba vote ia ka supplementary demand ka long kaba bakla bad kaba hap ban pynbeit.

Nalor kata u la ong, “Lada ki dei ban vote ia ka mang tyngka jong une u snem ha ka sngi Thohdieng ka mut ba ngi la jam palat ia u pud jong ki kyndon katkum ki rule.” Ia kane ka jingpynpaw ka jong u la ai jingkyrshan ruh da ka All India Trinamool Congress (TMC) bad ka Voice of the People Party (VPP).

Hynrei, haba pynpaw ia ka rai, u Lamphang ka iingdorbar u Thomas A Sangma u la ong, “Ngam don jingthmu satia ban pynpaw ba ka iing ka la shu pynsyrwa kai ia ka por. Hynrei, ha ka jingshisha ka long namar ka jingthmit palat jong ka por, kumta Nga la kyntu ban ym kren ia ki mat ki bym donkam bad ban kren thik tang ia ka mat kaba dei. Watla katta Nga pynbeit noh ia kane ka jingkren jong nga halor ki kyntien pynsepei kai ia ka por.”

“Watla katta halor ka mat kaba ar kaba iadei bad ki sngi shong dorbar ne calendar ka dei kaba la rai hapoh ka BAC bad ia kaba la wanrah hakhmat ka iingdorbar ha ka sngi sdang dorbar ha ka 16 tarik Rymphang bad ia kaba la mynjur da ka iing baroh kawei. Katkum ki rule ka jingpynsangeh shipor ia ki rule lah ban wanrah da ka parliamentary affairs, hynrei namar Nga la dep ban pynbnai ia ka ri kumta kane ka rai ka jong nga ka dei kaba khatduh,” ong u Lamphang.

Hynrei, namar ka jingbym hun ia kane ka rai jong u Lamphang, ki dkhot ka liang pyrshah kiba dei na baroh ki laitylli ki seng sain hima ki la ia mih jyndat napoh ka iingdorbar namar ka jingbym lah jong ka sorkar ban pynbeit ia ki jingbakla.

Haba pyrshang ban iada ia ka liang synshar, u Symbud Myntri Rangbah ka Jylla uba khmih ia ka parliamentary affairs, u Bah Prestone Tynsong  u la ong, “Ka jingshim rai ka jong phi (Lamphang) ka long kaba shai. Naduh ka sngi kaba nyngkong hi ngi la wanrah ia kane ka calendar hapoh ka BAC bad hapoh ka iing bad ai ia ka jingmynjur.”

Haba pynpaw ia kane ka jingleh jong ka liang pyrshah kum ka jingjia kaba sngew bynniaw, u CM Conrad Sangma u la ong ba ki dkhot ka liang pyrshah ki la shu pynlong ishu na kaei kaba ma ki hi ki la ia don bynta lang ha ka jingshim rai  hadien ba ka iingdorbar ka la pdiang ia ka calendar ba la tyrwa da ka BAC.

Nalor kata u la kynnoh ruh ia ki dkhot liang pyrshah ba kim kwah satia ban sngap ia ka jubab jong u halor ki jingiatai ia ka mang tyngka hadien ba ki la iohi ia ki jingtreikam kiba la jia bad urlong ha ka jylla.

Shuwa kane u Mukul Sangma ula ong “Ngi donkam ban pynbeit iaka jingbakla. Nga sngew ba kane ka long kaba kongsan, lym kumta kaei kaba bakla yn niew iaka kumba dei bad kaei kaba bym ju leh yn niew iaka kum ka rukom kaba buh jingma bad kam dei ban jia hadien habud.”