Mih jyndat ka liang pyrshah na ka dorbar ka KHADC ban pyrshah iaka ‘Elaka Administration Amendment Bill, 2023

Syllad | The Rising MeghalayaSeptember 26, 2023

Ki dkhot ka liang pyrshah ka Khasi Hills Autonomous District Council (KHADC), haka 25 tarik Nailur ki la mih jyndat noh na iing dorbar jong ka Council kum ka dak ka jingpyrshah hadien ba ka liang synshar ka la rai ban iaid shakhmat ban ai ka jingmynjur ia ka KHAD ‘Elaka Administration Amendment Bill, 2023.’

Ki dkhot ka liang pyrshah kiba kynthup ia ka United Democratic Party (UDP) bad ka Hills State People’s Democratic Party (HSPDP) ka la dawa ban sangeh ban mynjur  kyrkieh halor kane ka Bill da kaba aijingmut ruh ba dei ban phah shwa sha ka Select Committee ba kan shong bishar, kata da kaba kdew ia bun ki bynta kiba iatyngkhuh bad ki ain jong ka Elaka.

Hynrei wat hadien kane ka jingpynpaw pyrshah na ka liang ka EC ba la ialam da ka NPP bad Congress ka la rai ban pyniaid shakhmat ia kane ka Bill kaba la pynlong ia ka liang pyrshah ba kan mih jyndat noh napoh ka jingialang dorbar.

Na ka liang u Chief Executive Member (CEM) u Bah Pyniaid Sing Syiem u la pynthikna ruh ba kin shim ia ki sienjam ban pynbeit lada donkam ha kaba iadei bad kane ka Bill, kata da kaba ong ruh ba wat ka Constitution jong ka ri India ruh la wanrah ia ka 125th amendment.

Kham hashwa u nongialam liang pyrshah u Bah Titosstarwell Chyne u la kam ruh ba kiba bun ki MDC ki la shah rem noh ha ka ilekshon namar ka jingtuklar ha kaba iadei bad kiba kum kine ki jingiakynad hapdeng ki Hima. Kumta ruh u la bynrap ba kim long pyrshah ia kane ka Bill hynrei pyrshah ia ka jingshim rai kyrkieh jong ka EC ban aijingmynur ne ban pass ia ka.

Haba kren sha ki lad pathai khubor hadien kane ka jingialang dorbar, u Bah Titos Chyne u la shim ba ka jingiaid shakhmat ban pass ia kane ka Bill ka pynpaw ia ka jingleh donbor jong ka EC tang namar ka jingbun paid. U la ong ruh ba ka liang pyrshah ka la shim ia ka rai ba shen kin thoh sha u Lat bad ka sorkar Jylla ba kin shim ia ki sienjam ban tuklar ha kaba iadei bad kane ka phang.