Mih jyndat ka VPP napoh iingdorbar ba ailad jubab ia u Myntri halor ki jingkynnoh

Syllad | The Rising MeghalayaAugust 29, 2024

Ka Liang Pyrshah Voice of the People Party (VPP) haka 29 tarik Nailar ka la mih jyndat noh napoh ka iingdorbar thaw ain ban pynpaw pyrshah ia ka rai ban ailad ia u Myntri ka Tnad Pule Puthi u Rakkam A Sangma ba un jubab hapoh ka dorbar khlem da shim ia ki jingpynshitom pyrshah ia u halor ki jingkynnoh kren shun pyrshah ia ka party.           

Hadien ba u Symbud Lamphang u Timothy D Shira u la pynbna ia ka rai ban ailad ia u Myntri ka Tnad Pule Puthi ba un jubab ha ka mat iatai ba lyngkot ba la wanrah da u President ka VPP uba dei ruh u MLA ka Nongkrem u Bah Ardent Miller Basaiawmoit halor ka jingthungkam nonghikai ha Dadenggre Sub-Division, u Bah Ardent lem bad ki laingut kiwei pat ki MLA ka VPP ki la ieng na ki jaka shong bad mih noh shabar ha ryngkat ka jingpyrta , “Khlem ka jinglehrain, khlem ka jinglehrain.

Hashwa ba kin sa mih noh shabar, u Bah Ardent u la ong, “Ngan ym sngap satia ia u Myntri ka Tnad Pule Puthi (Ka jingkren shun jong u) ka pynkhein ia ka kyndon 196 jong ka BNSS.Lada u Myntri Rangbah lane uwei na ki Symbud Myntri Rangbah kim aijingkren halor kane ka mat Ngan ym sngap satia.”

Nalor kata u la byrthen ruh da kaba ong, “Lada ka Sorkar ka ailad ia u (Myntri) ban jubab, ngin mih noh. Ngim kwah ba kan don ka jingiakynad hapdeng ki Khasi bad ki Garo. Ka jingkren jong u ka kyntiew ia ka jingiashun hapdeng ki ar jaidbynriew.”

Hashwa kane u Symbud Myntri Rangbah u Bah Prestone Tynsong u la ong ba ka rule ka ong ba u dkhot haba aijingkren um dei ban kynthoh shimet ia kiwei pat ki dkhot.’

“Kumta Nga tharai ngi ailad ia u Myntri ba un jubab namar ba u MLA ka Nongkrem u Bah Ardent Basaiawmoit u la ieng bad pyrshah ia kane. Nga kwah ban kren shai ba ki jingkynnoh pyrshah ia u Myntri ki dei kiba ktah shimet.Kumta ngi la weng noh ia kane ka lain.”

Nalor kata u la aijingmut ruh ia une u nongialam ka VPP ba un ailad ba ka ain kan leh ia kaba donkam namar ba ki la dep ban mudui pyrshah da ka ejahar pyrshah ia une u Myntri Sorkar.

Katkum ka jingong ka jong u, ka VPP ka la wanrah ia kane ka mat hapoh ka iingdorbar khlem kano kano ka kyndon.

“Balei ngi wanrah ia kane ka mat hapoh ka iingdorbar. Ai ba ngin iaid katkum ki rule. Kane ka dei ka jingkynthoh shimet pyrshah ia u dkhot uba dei ruh u Myntri hapoh ka Sorkar,” ong u Bah Prestone.