Mih ka jingiakynad ha Khanduli thang iaki trep mynsaw uwei shah lun maw bad shah pom ka kali u SP West Jaintia Hills

Syllad | The Rising MeghalayaMay 11, 2023

Ka jingiakynad hapdeng ki ar jaidbynriew, katta ki nong Karbi bad ki Khasi Pnar kaba la neh la khamslem na ka jingiakhajia pud hapdeng ka Assam Meghalaya kala paw pyrthei da ka jingiasyndong kti bad ktah kti mar kylliang kaba la wanrah iaka jingmynsaw uwei u nong karbi haka sngi Palei.

Kane ka jingjia kala jia haka por kumba 1 baje eiei hadien ka jingjia shah thang ki 2 tylli ki trep ha jaka rep kaba la tip kum ka madan Khanduli.

Ka khubor ka iathuh, la kynnoh ba 8 ngut ki nong Karbi kila beh ia uwei u nongrep ba na ka shnong Khanduli bad thang ruh iaki ar tylli ki trep buh kba.

Mar mar une u nongrep ula iathuh ia ki para nongshong shnong kiba la beh kylla ia kine ki nong Karbi, pynban kala mih ka ia syndonkti bad iashoh iadat ha kaba uwei u nong Karbi haka jingiashoh iadat ula mynsaw ha kane ka jingjia.

La iathuh shuh shuh baki nongshong shnong ka Khanduli, kila lum jingialang kyrkieh bad pyrta shnong.

Ki nong Karbi ruh kila lum paid bad mih paidbah, hyrnei la pakhang lynti noh ha ki pulit Assam kiba ap pahara ha Khanduli.

U SP West Jaintia Hills Ma C Syrti ruh uba la hiar sha katei ka jaka ula leit sha ka jaka ba don ki pulit Assam, pynban ka kali jong u kala shah lun maw bad shah pom da ka kynja wait kaba la pynlong ia u ban phet na katei ka jaka.

Ka khubor ka iathuh ba u SP uba la leit da kali Mahindra Scorpio (ML 05 N 7887) shimet (private). U SP ula hap ban phet krad na katei ka jaka namar ba la khie wahleng u paid Karbi.

La iathuh ba u SP ula leit sha katei ka jaka ba jia ryngkhat ba ka DC West Karbi Anglong bad ki heh pulit na Hamren ki don sha Khanduli, bad da ka jingthmu ban leit iakren kala mih noh kane ka jingjia lun maw bad shah kawang da ki kynja wait sha ka kali motor jong u ha u paidbhur na ki paid Karbi.

Haduh bala thoh iaka khubor ka jinglong jingman kala jai jai bad ki pulit na baroh ar jylla, kata Assam bad Meghalaya kila tem iaka jingiakynad.