Mih ka seng ban kren ïaka sur u Jaiñtia ban roi par Salonsar

Syllad | The Rising MeghalayaMarch 15, 2020

Ka kynhun jong ki nongshong shnong ka Jowai kila thaw da kawei ka seng kaba la suit la shor kyrteng kum ka Jaintia People’s Welfare Organisation (JPWO) ban rah ïaka sur u nong Jowai bad ka Rilum Jaiñtia baroh kawei halor ka kam pynroi pynpar ka thain bad ka jingdonkam ba man ka sngi u briew haka imlang ka sahlang.

Ïa kane ka seng JPWO la thaw haka sngi Saitjaiñ haka jingialang kaba long ha Indoor Hall jong ka Chutwakhu, Jowai kaba la khot da u MDC barim jong ka JHADC u ma Philemon Lyngdoh.

U Ma Philemon Lyngdoh haba kren shuwa ban thaw ïa ka JPWO, ula ong “Ka sor Jowai mynta imat ym don shuh ba peit bad ba ïakren na ki bynta ki jingdonkam jong ka haka liang ka roi ka par bad ki jingdonkam ba man ka sngi u nongshong shnong bad u paidbah ba bun ba lang u sngap jar jar.”

“Naduh ka jinglip khah khah ka bording, kaba ka tnad MeECL khlem ka jingpyntip paidbah ka pynlip ïaka bording katba mon bad lehbymsuidniew ban ai ka jingshakri kaba pura ïa u nongpyndonkam bording. Nalor kata ka umbam umdih ha Jowai bad kiwei ki shnong ba marjan ki don hapdeng ka jingdkyrduh um namar ba bym biang ka rukom sam um ka tnad PHE,” ong u Ma Philemon bad ula ong ruh ba kane ka pynlyngngoh ïa u paidbah nongshong shnong jong ka Jowai bad ki sah haka umdum bad ym don kawei ruh ka kynhun ne seng ban kren ne pynsngew ïaka sur u paidbah sha ki tnad sorkar ban kin pynbiang ïaka jingshakri ka jong ki.

U Ma Philemon ula ong shuh ba kawei pat ka jingdonkam kaba kongsan bha ka dei ha kaba iadei bad ka koit ka khiah u nongshong shnong ka thain, ba ka sorkar bad ka tnad ka koit ka khiah kaleh aiu ban iada na ka jingpur u khniang COVID-19, uba u pur ha kiba bun ki ri haka pyrthei kaba la wanrah ruh ka jingjia kaba sngewsih.

Ka tnad ka koit ka khiah kala pynmih ki jingpynbna paidbah sha ki lad pathai khubor paidbah bad ki kot khubor, hynrei katno ngut ki nongshong shnong kin ïoh ka jingtip kumno ban ïada na une u khniang ba iabit.

Ka sorkar haduh mynta kam pat ai kano kano ka jinghikai la ha ki skur, ki shnong ha ki jaka nongkyndong kiba ki lad ioh jingtip kum ki kot khubor kim poi thikna.

Kiwei ki mat kiba ula kren ki dei halor ka lad ïoh kam jong ki khun samla kiba la nang la stad, kiba ka jingkyrduh kam ka jur bha, hynrei ka sorkar ka leh bymsuidniew ban plie ki lad ki lynti ïaki khun samla ha Rilum Jaiñtia ban seng kam ban aikam bad mynta wat ha ki tnad sorkar kiba pyntrei ïaki skhim bapher bapher ruh ki ai kam kontrak haka jingsiew kaba rit, kaba buh jingeh ïaki samla ban pynbiang ïaka jingdonkam ka jong ki.

Ha kaba iadei bad ka lynti ka syngkieng, ki surok paidbah bun ki surok kila sniew bad kiba khapkngiah, hynrei ka sorkar leh kuman ban leh ïaka donkam bad kane ka long kum u maw jynthud ïaka roi ka par, ong shuh shuh u ma Philemon.

Ha kane ka jingïalang hadien ka jingïathir bad ïaphylliew jingmut kaba sani bha la rai ban thaw ïaka JPWO bad la jied ruh ïaki nongkitkam ki jong ka.

La jied president ïa u ma Philemon Lyngdoh, vice-president ia u ma Bismol Myrten, Secretary Russel Nongrum, Assistant Secretary Ebormi K Sutnga, Finance Secretary Syrpaiwanka Laloo.

Ki dkhot ka executive committee: LD. Lakiang, Daneal P Gatphoh, RN Gassah, Ruhi Phawa, Allwyn Laloo, Daribait Passah, Wansalan E. Dhar, Dr. Rebecca E. Laloo, Agatha Challam, Rimiki Challam, Pyntngen Lato, Alos Mary Laloo, Lammitre Lyngdoh, Nehemaia Suchen bad ka Gloriowaly Laloo.

Kane ka seng kala rai ban shong jingialang biang ha ki kyndiat sngi ki ban wan ban shna ïaka riti treikam bad ban jied shuh shuh ïaki dkhot ban trei n aka bynta ka miat ka bha ka imlang ka sahlang ban ïoh ïa kata ka roi ka par kaba salonsar.