Mih ka seng ENYC ban pyrshah halor ka project tih mawshun ha Brishyrnot

Syllad | The Rising MeghalayaSeptember 29, 2024

Ka Elaka Narpuh Youth For Change (ENYC) ka seng kaba dang shu mih ha ka Elaka Narpuh bad kaba peit ia ka bha ka miat ki khun Samla jong ka Elaka Narpuh ka pynpaw ka jingpyrshah kaba jur ia ka Public Hearing jong ka Star Cement Meghalaya Limited ha kaba iadei bad ka project tih mawshun jong ka ia kaba la tip kum ka ‘Brishyrnot Limestone Deposit -II kaba don ha Shnong Brishyrnot, Elaka Narpuh, East Jaintia Hills.

Ka Seng ka la ong ba ki daw jong ka jingpyrshah jur ia ka jingtih mawshun na kane ka jaka kalong namar ba kane ka jaka kaba heh haduh 65 Hectares ha Brishyrnot ka dei ka jaka kaba iajan bha bad ka Wah Lunar, kata tang  kumba 20-30 mitar. Kumta lada shah ban tih mawshun ha kane ka jaka kan long ka jingtim ia ka mariang namar ka Wah Lunar kan rngad noh bad ka Wah Lukha kaba jngai kumba 500-600 mitar na kane ka jaka ruh kan mad ruh kan mad ia kajuh ka jingeh.

Ka seng ENYC ha u kyrwoh lyngba u President bad Secretary ka la ong ruh ba ka Star Cement Ltd kawei ka cement plant kaba heh tam hapoh North East kam ju khein snep ia ki briew jong ka Elaka Narpuh bad barabor kam juh aikam ia ki trai Shnong bad ki trai Elaka Narpuh, bad kiba ioh ban trei ha kane ka Company ruh ki long tang kito kiba iajan bad ka Company bad kam juh ai ia ki post baheh sha ki trai shnong bad trai Elaka watla ki la don kiba la pyndep ia ki jingpule ha ki kyrdan ba shalor kum ha ka Engineering, M.Com, MBA bad bunsien ka ai tang ia ki post Grade IV kum ki Cleaner, Peon, Gardener, Driver. 

Ka la ong ruh ba ka jingwan bad ka jingdon ki Company hapoh Elaka Narpuh ka long tang ka jingtim ia ki khun ka Elaka namar ki shu kamai spah bad kim juh burom ia ki trai shnong trai Elaka. Ki Company kiba don ha Elaka Narpuh khamtam oa Star Cement ka pyndonkam da ka ‘divide and rule policy’ khnang ban suk ban pyntrei bad pyniad ia ka Company jong ka.

Nalor kata ka Seng ka la ong ba lada ailad ban tih mawshun ha Brishyrnot kan ktah ia ka Wah Lunar bad Wah Lukha bad kumjuh ruh ia ka Narpuh Wildlife Sanctuary bad ka Narpuh Reserved Forest. Kan ktah ia ka lyer khuid kaba mih na khlaw na btap Narpuh Reserved Forest bad ki nongshong shnong kin ioh ring mynsiem pynban da ka lyer jakhlia. Kan ktah ruh ia ki dohum dohwah kiba Don ha Wah Lukha bad kan long ka jingtim ia ki briew kiba im ja da kaba khwai ha Wah Lukha.

Ka Seng ka la ong ba katkum ka jingkular jong ka Star Cement ka long ban aikam ban aijam ia ki trai shnong, bad lada peit ia ka Meghalaya Industrial policy Act ki trai muluk ki dei ban iohkam haduh 60% hynrei katkum ba long mynta ki trai shnong trai Elaka kiba trei ha star cement ki long tang 20% bad 80 % ki dei ki bar jylla.

Kumta halor kine ki nongrim ka Seng kan pyrshah jur ia ka Public Hearing jong ka Star Cement ka ban long ha ka 08/10/2024 ha ha Brishyrnot bad lyngba une u kyrwoh ka khot ka wer ruh ia ki paradoh para snam khamtam ia ki paitbah ka Elaka Narpuh bad ki sengbhalang kiba don ha Ri Khasi Jaintia ban pyrshah jur ia  kane ka public hearing jong ka Star Cement khnang ba kan ym long ka jingtim ia ka pateng ban Wan .