Mih ka SWS Ri Jaintia ban dawa na ka sorkar ban pynioh jaka theh niut iaka Jowai, khot iaka jingiatreilang u paidbah, ka jingkylli hato ki synjuk waheh shnong ki iatreilang?

Syllad | The Rising MeghalayaAugust 11, 2021

Ka Synjuk Waheh Shnong Ri Jaintia (SWSRJ) haka sngi Balang kala dawa na ka sorkar Jylla ban pynkloi ban kynriah iaki ñiut na sor Jowai bad ban pynioh iaka jaka bret ñiut kaba paka iaka Jowai ban bret ñiut.

Ka SWSRJ kala dawa ia kane hadien ka jingialang kyrkieh kaba long ha Mihmyntdu hadien bala phiel ka Jowai Municipal Board (JMB) bad ka Jaintia Hills Autonomous District Council (JHADC) ban pynlang iaki ñiut na ki iew ki hat kiba la sma iwtung ha Iawthymme Ladthadlaboh, Iawmusiang bad hajan Thomas Jones Synod College.

Kane ka jingsangeh ka JMB bad JHADC ban pynlang ñiut ka dei hadien ba ki 6 shnong naduh ka Mupyut, Umsalang, Madantyrpait, Moosakhia, Pynthorlangtein, Skhenpyrsit bad Khasi Students’ Union (KSU), War Jaintia Circle kila pyrshah iaka jingtheh ñiut namar ba kalong thurmur bad ktah iaka koit ka khiah ki shnong ba marjan bad ka Mynkjai.

Kane ka jingpyrshah ki 6 shnong bad ka KSU kala wanrah pat ka jingiakhih pyrshah na ki synjuk waheh chnong Jowai ban ai Quit Notice ne ban khang ia ki shnong ba pyrshah, ka KSU bad iaka synjuk Waheh Shnong War Jaintia ban wan sha Jowai bad rai bym nym iatreilang bad ka bor synshar district ka West jaintia Hills tad haduh bala weng iaki ñiut na Jowai.

U president SWSRJ, Arminius Lipon ula ong ba ka District West Jaintia Hills ka dei kaba shah ieh khunswet khamtam ka sor Jowai kaba long ka sorbah jong ka West Jaintia Hills District bad la sakhi iaki jingeh jong ka halor ka kam bret ñiut,

Ka Synjuk kala khot ia baroh ban pynneh iaka jingiatylli bad ka shongsain bad ban pynduh iaka jingsngew iapher.

U Arminius ula ong ban weng ia kane ka jingeh ha baroh ki iew bad ki shnong ki thaw la khot bad kyrpad iaka synjuk waheh shnong bad ki nongshong shnong ban iatreilang bad ban long kawei ban pynjem iaka jingeh halor ka niut kaba ktah iaka koit ka khiah.

Sngewkhia ka HYC halor ka kam theh ñiut ha Mynkjai, kyntu iaki ar synjuk waheh chnong bad ki shnong ba pyrshah ban iakren pynbeit

Ka jinglum thup iaki niut ha sor Jowai khamtam ha Iawmusiang, Iawthymme bad hajan Thomas Jones Synod College kala sangeh mynta la bun bun taiew hadien ba la don ka jingpyrshah naka ka shnong Mupyut bad ki shnong ba marjan ban bret niut hadien ba kila iakynduh ka juh ka jingeh namar ka jingsma iwtung kaba ktah iaka koit ka khiah,la ong u Arminius Lipon president Synjuk Waheh Shnong Ri Jaintia.

U adviser ka Synjuk Ri Jaintia, U Shelsing Langi ula ong ba ka sorkar ka dei ban pynkloi ban shna iaka jaka ba pura bad kyntu iaki nongshong shnong ba pyrshah ban iai shah bad ailad iaka sorkar ban theh iaki niut shipor bad ban ka dei ruh ban buh da ka por kaba thikna ban shna iaka jaka bret ñiut.

Hadien ka jingshangeh lum niut ka JMB, u Shelsing Langi ula ong kala don ki jingkynthoh bad ka jingsngewiapher bad ula kyntu ban kiar na ka jingkynshoit namar ba kane ka jingpang kala don lypa bad ka ñiut ka dei kawei na kam huri hura (public nuisance) iaki paidbah lada ka sorkar kam lah ban teh lakam.

Ula banjur iaka sorkar bad iaki paidbah ban iatreilang ryngkat bad ka sorkar namar ba ka sorkar kala wad iaki jaka ban bha ka miat kaimlang sahlang.

Kaba phylla kalong ba kine ki juh ki briew kiba khot jingiatylli ban don ka shongsuk shongsaiñ u paidbah bad ki shnong ban tei iaka imlang ka sahlang, hynrei kine ki synjuk ki don hala ka jong ka liang.

U Arminius Lipon u dei u waheh shnong ka Pynthorlangtein bad u don jingtip bha iaka jingeh ka Mynkjai. Ha kine ki 4-5 bnai ba sdang biang ka jingiakhih kine ki synjuk ki leh aiu kum ki nongialam synjuk waheh shnong.

Kiba bun hi kila dawa ba ki synjuk waheh shnong ki dei ban sdang shuwa maki ban iatylli ban wanrah iaka jingiakren halor kane ka jingeh bad ban pynjem iaka khnang ban tei iaka imlang ka sahlang.