Mih ki jingjia tyngkhuh kali ba khah khah ba sniew palat ka surok NH-6: FKJGP

Syllad | The Rising MeghalayaSeptember 20, 2023

Ka Seng FKJGP-East Jaintia hill District Unit ka pynpaw ka jingsngewkhia kaba jur ha kaba iadei bad ka jingjot rathai jong ka surok NH-6 bad ong ruh ba kane ka long ka daw bah kaba la wanrah ia ki jingjia tyngkhuh kali ba khah khah ha kane ka lynti surok bah.

Halor kane ka ai ruh ka jingkyrshan ka ba pura ia ki kynhun khamtam ia ka KSU East Jaintia Hills halor ka jingdawa ban maramot noh kloi ia kane ka Surok NH6 naduh Khliehriat shaduh Ratacherra namar kumba ka long mynta kam i iahap shuh ban ong ba ka dei ka surok National Highway.

Nalor ki jingjia tyngkhuh kali ba khah khah kiba wanrah ia ki jingjia ba sngewsih, ka seng ka la ong ba ka jingsniew jong kane ka surok ka la wanrah ruh ia ka jingshakut kali kaba shyrkhei wat ha ka thain Khliehriat kaba dei ka headquarter jong ka district bad kaba long shisha ka jingjah burom ia ka district hi baroh kawei.

Shuh shuh ka FKJGP ha u kyrwoh lyngba u Information Secretary u Bah Mishal Chyrmang ka la ong ruh ba kum ka seng hi ka la dep ban pynher shibun ki jingthoh sha ka NHAI lyngba u Deputy Commissioner ka East Jaintia Hills na ka bynta ban maramot ia kane ka surok NH6 hynrei ka NHAI kam shym la pynsngap bad kut tang ha ki jingkular thok.

Kumta na ka liang ka Seng ka kyrpad ia ki arngut ki MLA ka thain kata u Bah Kyrmen Shylla bad ka Kong Santamary Shylla ba kin shimkhia lem ha kaba iadei bad ki jingeh jong ki paidbah namar kum ki paidbah hi ki jied ia ki na ka bynta ba phin peit ban khmih halor halor ki jingeh kiba ki iakynduh.