Mih ki khynnah ka Tpep Pale School Jowai sha surok ban iakhun pyrshah ia u duma

Syllad | The Rising MeghalayaMay 6, 2022

Ki khynnah skul ka Tpep Pale School, Jowai haka sngi Thohdieng kila mih sha surok ban iaid paidbah ban ïalap bad pynsngewthuh paidbah halor ka jingma naka jingdih bad bam duma. Ka mat pdeng ka long ‘Tobacco vs Environment’.

Kane ka jingiaid paidbah ka long kum shibynta ban rakhe iaka sngi pyrshah ia duma kaba juh rakhe manla ka 31 tarik Jymmang ha satlak ka pyrthei kaba la tip kum ka World No Tobacco Day.

Kane ka jingïaid rally ka sdang na phyllaw ka skul bad ïaid lyngba ka surok Wah Nangbah ter ter sha Ïawmusiang, Mission Lion Compound bad pynkut ha phyllaw skul da kaba rah lang ïaki jingthoh pyrshah duma.

Haba poi ha Iawmusiang la pynlong iaka jingialang kaba lyngkot ha kaba u Headmaster ka skul u RS Teron ula kren halor ka jingktah bad ka jingma kaba la mih na kaba dih duma, ha kaba ka jingdih duma kam shem la ktah tang ïa uto u nongdih hynrei kaba sngewsih ka la long ba ka ktah wat ïa kito ki bym dih ruh kumjuh.

Ula kyntu ïaki khynnah skul ba kidei ban long ka nuksa bad ban pynsaphriang ia khubor halor ka jingsniew bad jingktah u duma khnang ban jop pyrshah ia u duma.

Hashwa kane la ïoh ka jingrwai kyrpang na u Nevel Phawa khynnah Class X.