Mih ki paid nongkyrshan ka UDP thep kyrteng u Ma Moonlight Pariat na Jowai Constituency

Syllad | The Rising MeghalayaFebruary 6, 2023

U Ma Moonlight Pariat MDC barim ka JHADC uba long u kyrtong jong ka United Democratic Party (UDP) na 2 Jowai Constituency ula thep kyrteng haka sngi Nyngkong.

Ha kane ka jingthep kyrteng jong u ma Moonlight la synranlang ia u da ki paid nongkyrshan jong u na kylleng ki shnong kiba hap haka Jowai Constituency naduh na iing sah jong u ha Dulong haduh ban da poi ha DC ophis.

U Ma Moonlight hadien ka jingthep kyrteng haba kren bad ki nongthoh khubor ula ong ba la wan ha thong un tem bad khang lad iaka jinglait rud ka pisa na ka pla sorkar bad ban pynkhie im iaka sorkar Jylla kumjuh ki District Council.

Kaba ar ka long lada wan haka por ka thong ka long ban pynkylla bad pyntreikam salonsar iaka education policy ban pynioh lad ban leit skul ei ne khlem da donkam ban siew bai skul iaki khynnah haduh 14 snem ka rta ban iarap iaki kmie ki kpa kin lait ban luktsan.

Kaba lai ka dei ban pyndep iaka jingtei pynbha iaka Iawmusiang kaba ula wanrah lyngba pisa lyngba ka DoNER haka por ba u long kum u MDC JHADC. U la ong ruh ba haka jingpyrkhat jong u kane ka skim kala kut por ne lapse, hynrei lada wan haka jingjop un pyndep ia ka jingtei lyngba kiwei pat ki skhim.

Kawei pat ka dei ban pynjem iaka jingeh ki nongshong shnong ka Jowai bad ki nongshong iew ban lai na ka jingsma iwtung ka ñiut. “Lada nga shah jied kum u MLA hapoh 6 bnai ngan shna iaka jaka bret ñiut kaba don ha Mynkjai da ka jingiatreilang bad ki nongshong shnong ha Mynkjai bad ka District Council.”

“Ia kane ka jaka theh yn pynbha da kaba ker kynroh ban ban shna iaki jaka thang ne furnace ban pynkhuid iaki ñiut bad ban shna iaki sboh da kaba shna iaka Compost Plan ban pynkylla iaka ñiut sha ka spah ne ka pisa,” la ong u Ma Pariat.

Shuh shuh ula ong ba un pynthikna ban pynbiang card rashon ia baroh ki nongshong shnong kynthup ia uba duna dor bad uba ioh ei bad ban pynthikna ban shna iaki iing baduk da ki spah tylli ha baroh kawei ka constituency lyngba ka PMAY bad ka IAY.

Kawei pat ka mat jong u ka dei ban pynjem iaka jingkhapngiah ka Jowai da kaba pynkylluid iaka Jowai. Ula ai nuksa ba lada iaid na Khimusniang sha Mihmyntda ka shimpor da ki kynta, hynrei ka UDP ka don iaka master plan ban pynkylluid iaka jingkhapngiah iaka Jowai

Ula ong ruh ba yn pynbiang bad pynioh iaka um kaba pahuh ban pynbiang um ia kawei pa kawei ka longiing bad nalor ka skim ka Jal Jeevan Mission (JJM) kaba dei ka skim sorkar kmie yn wad ruh na kiwei ki lad jingiarap.

Ha kaba iadei bad ki samla kiba la nang la stad, ula ong ba um kop kumba kop ka TMC bad ka NPP kiba la kular ban ai kam haduh 3 lak bad 5 lak ngut ki samla, hynrei na kaliang jong u pat ula ong ba tang ka kam sorkar ka don 10000 tylli ki post kiba thylli bad lada lah ban thung tang ia kine ki post ba thylli ruh kan iarap iaki samla kiba kyrduh kam. Kiwei ki kular bad pynbiej kumba ong u Bah Prestone Tynsong ba ki politician ki pynbiej briew man la ka san snem, hynrei ki paidbah kim dei ban ngeit beit bad ula ong ba um kular ia ka bneng ka khyndew bad ula kyrpad iaki paidbah ban ailad ne jied ia u kum u nongmihkhmat ban ioh ka lad ban treikam bad ban shakri ia u paidbah kaba ula thrang naduh mynsiem.

Ha kaba iadei bad ka surok ula ong ba ka jingshna surok ha Jowai Mihmyntdu ka dei kaba torti kaba la shu siang tangdep. Ula ong ruh ba kine ki surok kiba la trei dei kiba khlem bud iaki kyndon ka PWD bad tang hapoh shibnai ka surok kala jot la pra bad ki kontrak kila shu trei tangdep.

Ha kine ki san snem ka Jowai Constituency ka dei kaba la duh jingkyrmen namar ba ha u 2018 ka jingkular kadei kaba heh, hynrei ha kine ki san snem baroh ki lehnohei. Kumta ula kyrpad iaki nongshong shnong naduh ki samla kiba la kynjoh 18 snem shaneng haduh ki longkmie bad ki rangbah ban iatreilang bad ban ai lad ia u ban shakri iaka Jowai Constituency baroh kawei.