Mih ki sap ki phong ba nylla ki khynnah na Ri Bhoi, mynta ka sngi yn iit khynnah ialehkai ha Jowai

Syllad | The Rising MeghalayaJuly 22, 2022

Ka jingïit iaki sap ki phong ba nylla haka kam ialehkai Athletic ha Jylla lyngba ka Talent Identification Programme (TIP) kaba pyniaid da ka Meghalaya State Olympic Association (MSOA) ha ryngkat ka jingiatreilang jong ka tnat Sports & Youth Affairs jong ka sorkar jylla bad ka EDGE 10 Group kala wanrah ia u soh bad la lah ban ithuh iaki khynnah kiba la don iaki sap ki phong kiba nylla.

Haka kane ka jingïit khynnah ialehkai kaba la pynlong ha Ri Bhoi haka sngi Thohdieng, ki don lai ngut ki khynnah kiba kynthup ia kawei ka kynthei kiba la shah jied haka TIP.

Kine ki kynthup ia u Rooney Lyngdoh 11 snem uba la lah ban mareh 2.71 min haka 10m Ladder Run, u Kitboklang Shangpliang 15 snem bad ka Badahunlang Syngkli 18 snem kaba kynthih ne vertical jump test haduh 50 cms. Kane ka jinglap ka TIP ba kane ka jinglah kine ki khynnah ka iahap bad ka international standard.

Shuh shuh la iathuh ba ka West Khasi Hills bad ka Eastern West Khasi Hills ruh ki don bun ki khynnah kiba don iaka sap kaba nylla.

Na ki 9 tylli ki district haduh 16 ngut ki khynnah ialehkai ki don ka sap kaba kynsai kaba iahap bad ka international standard.

Ka MSOA kala iathuh ba lashai ka sngi Saitjain (23 tarik Naitung) kan long ha Jowai, West Jaintia Hills District pynbud haka 25 tarik ha Khliehriat, East Jaintia Hills District.

Ka jingjurip bad ka jingiit iaki khynnah yn pynkut ha Sor Shillong haka 26, 27, 28, & 29 ha indoor basketball stadium, St Anthony’s HSS, Laitumkhrah, Shillong, East Khasi Hills District.  

La pynbna ruh ba ba kino kino kiba ym shy la iohlad ban shimbynta haka TIP ba kin pyntip mar mar lyngba ka email: [email protected],  [email protected], [email protected], [email protected] lane phone ha u Bah Dipshon Ryntathiang, chairman, Podium Finish Committee, MSOA, 9774006394, Ma Finely L Pariat, General Secretary,  9856041365,  lane ha u Bah John  F Kharshiing, Working President, MSOA, 9436102663

Ka Edge 10 kadei ka kynhun kaba ialam khmat da u Ian Campbell, u Olympian (1980 Moscow Olympics) uba la thaw ia ka world record ha kato ka por bad u Alistair Tait, Global International Coach na Australia.

Ka jingjurip ia kine ki khynnah ka long ha ki 4 jait ki test katta ka 20M Sprint, 10M speed ladder run, Compass Drill, and the Vertical Jump.