Mih kynrum kynram ka JAC, khot jingialang paidbah ka JHTOA

Syllad | The Rising MeghalayaOctober 12, 2021

Ka Jaintia Hills Truck Owners Association (JHTOA) hadien bala mih ka kynrum kynram na ka JAC kala khot iaka jingialang paidbah lashai ka sngi 13 tarik u Risaw (October) ha Phramer Community Hall ha ka por 12 baje mynsngi.

U President JHTOA U Nidamon Chullet ula wer ia baroh ki trai trok ban wan sha katei ka jingialang ban iakren sani halor kiba bun ki jingeh jong ki trai trok.

U Nidamon ula iathuh ba ki mat ban iakren ki kynthup iaka kynrum kynram kaba mih ha kaba iadei bad ka JAC kaba la iakhih ban kyntiew iaka bai kit mar mata na ki karkhana dewbilat.

Ula ong kawei pat ka mat kadei halor ka jingthied trok 16 shaka ka Star Cement haduh 300 tylli bad ka jingpynkynriah iaka jaka buh cement ne godown ki karkhana dewbilat na Jylla sha Assam.

Ka JHTOA kala kyrpad baroh ki trai trok ban wan sha katei ka jingialang khang ba ki jingthmu jong ka JHTOA kin long kiba iaid beit iaid ryntih.