Mih noh ka Congress na ka EC ba ialam da ka NPP ha KHADC shwa ka elekshon ADC

Syllad | The Rising MeghalayaDecember 14, 2024

Ha kaba khatduh ka Congress ha ka 13 tarik Nohprah ka la mih noh na ka Executve Committee (EC) jong ka Khasi Hills Democratic Front (KHDF) ba ialam da ka National People’s Party (NPP) ha Khasi Hills Autonomous District Council (KHADC), kata khyndiat bnai shwa ban leit sha ka elekshon sha ka iingdorbar thawain ka KHADC.

Kane ka la wan long hadien ba u nongialam ka Congress ha KHADC u Bah PN Syiem ula aiti ia ka shithi iehnoh kam kum u Deputy Chief Executive Member (DyCEM) katba u Bah Ronnie V Lyngdoh kum u Chairman ka Advisory Committee ka Council sha u CEM bad Chairman ka KHDF u Bah Pyniaid Sing Syiem.

Haba kren sha ki lad pathai khubor u Bah PN Syiem u la ong, “Ngim don lad da kumwei pat lait na kaba mih noh na ka EC ba la ialam da ka KHDF. Namar ba ki nongialam bad ki nongtrei ka party kim sngew iahap ban iatreilang bad ka NPP ha KHADC, kumta ruh ngi la rai ban burom ia ka jingsngew bad ka jingai jingmut ka jong ki.”

U Bah Pynshngain u la pynkynmaw ba ki nongialam bad ki nongtrei ka party ki la pynbor ia ki nongialam ka Congress ha KHADC ba kin weng noh mardor ia ka jingkyrshan ia ka EC ba ialam da ka NPP naduh ka 20 tarik u Nailur mynta u snem. Kumjuh ki president jong ki District Congress Committee (DCC) kila phah shithi dang shen sha ka AICC ban phah tuklar halor ka jingslem jong ki MDC ban mih noh na ka EC ba la ialam da ka NPP ha KHADC.

Haba kylli ia ka daw sha lyndet ka jingpynslem ban weng noh ia ka jingkyrshan ia ka NPP, u Bah Pynshngain u la ong, “Naduh ka sngi kaba nyngkong ngi la rai ban iatreilang bad ka NPP ha KHADC, ngi la iakren shai ia ki kamram jong ngi kaba long ban bud i ki mat kiba kongsan kum ka jingtyrwa ban wanrah jingkylla ha ka Sixth Schedule, ban pynkupbor ia ki jingtreikam kiba katkum ka tynrai. Kine ki la don ha ka jingpynkhreh ban pynurlong ia ki. Kumta kam long kaba bha ia ngi ba ngin shu shim rai kyrkieh namar ki don ki mat kiba ngi dang donkam ban iatreilang na ka bynta ka jingmyntoi jong ki trai muluk. Namar kata ka jingpynslem.”

Haba iaroh ia ka EC ba la ialam da ka KHDF namar ka jinglah ban pynurlong ia shibun kiei kiei tang hapoh ka por ba lyngkot, u Bah Pynshngain u la ong, “Ngi la lah ban pynurlong bad pynbeit ia kiba bun ki mat kiba iadei bad ki jingtreikam kiba katkum ka tynrai. Wat ha kaba iadei bad ka jingtyrwa ban wanrah ka jingkylla ha ka Sixth Schedule ruh dang shen ngi la iakynduh ia u Adviser ka Ministry of Home Affairs ban iakren ia ki jingai jingmut ki jing ngi. Kine ki dei ki daw kiba la pynlong ia ngi ban pynslem ban shim ia ka rai ban weng noh na ka EC.”

Nalor kata u la kdew ruh ïa ki jingai jingmut kiba bha ba la ai da ka EC ha kaba iadei bad ka jingthmu ban pynkylla ia ka Sixth Schedule jong ka Riti Synshar ka Ri India.

“Ngi la aijingmut ba u Lat um lah satia ban thung ne pynieng ia uno uno u MDC khlem ka jingai jingmut jong ka District Council. Ngi la ban jur ba ka jingthung ia u MDC ba la tyrwa kyrteng ka dei ban long katkum ka jingai jingmut jong ka District Council. Kumta ngi la iada na ka bynta ka jingmyntoi jong ka Council bad ki briew jong ngi,” u la ong da kaba bynrap, “Ngi la pyrshah ruh ia ka jingthmu ban pynrung ia ki riewlum bym don nongmihkhmat. Ngi ong ba kin don tang arngut ki MDC ba la ai kyrteng bad uwei na kine ka dei ban long ka kynthei bad ia ka kyrteng jong ki dei ban aijingmut da ka District Council.”

Ha kawei pat ka liang, une u nongialam ka Congress u la ong ba ka rai jong ka party ban weng noh ia ka jingkyrshan kan ym don jingktah satia ia ka party sha ka elekshon ka ban wan jong ka KHADC.

“Kan ym don satia kano kano ka jingktah ia ngi ha ka elekshon ka ban wan namar kan shong eh ha ka jingtreikam jong ki nongialam. Lada ki MDC ka Congress ki lah ban leh shibun kiei kiei tang ha ia por ba lyngkot, ki paidbah kin kham khmih lynti bun na ngi bad ngin sa leh ia kaba donkam,” u la ong.

Haba jubab ia kawei pat ka jingkylli, u Bah PN Syiem ula ong ba ka Congress kan shong mynta ha ka Liang Pyrshah bad ka long kaba la pynkhreh ban leh ia ka bynta kaba tei hapoh ka iingdorbar.

“Ka rai ka jong ngi ban weng ia ka jingkyrshan kan ym ktah satia ia ka EC namar ki dang don bun paid. Ki dang don 16-17 ngut ki DKhot ha ka KHDF,” ong u Bah Pynshngain.