Mih noh ka HNLC na ka jingiakren iasuk bym shimkhia ka Sorkar: Pala

Syllad | The Rising MeghalayaJanuary 10, 2024

U MP ka Seng Congress na Shillong bad president ka MPCC u Bah Vincent H Pala haka 9 tarik Kyllalyngkot, u la kynthoh tyngeh ia ka Sorkar pdeng bad Sorkar jylla halor ka jingbym shimkhia ban pyniaid beit shakhmat ia ka jingiakren iasuk bad ka Seng Hynniewtrep National Liberation Council (HNLC) kaba la pynlong ia kane ka Seng ba kan mih noh na kane ka jingiakren.

Haba kren sha ki lad pathai khubor, u Bah Pala u la ong, “Ka long kaba sngew bynniaw jur ban iohi haba ka seng HNLC kala long la kloi ban wan sha ka mieu jingiakren, hynrei kam shym la don ka jingshimkhia na ka liang ka sorkar BJP hapoh Delhi kumjuh ka sorkar jylla. Lada phin phai halor baroh kine ki mat ne issue, ki dei tang ki jingkular kai ba khraw jong ka sorkar lyngba ki mat treikam, hynrei haba phai halor ki jingshisha kim shym la salia ne pynleit jingmut na ka bynta ki nongshong shnong jong kane ka thain shatei lammihngi (Northeast) jong ka ri.”

U Pala u la kam ba ka Congress ka la pyrshang ia kaba bha tam ban pynduna ia ki kam lehnoh da kaba wanrah ia ka jingsuk. U la ong, “Phi iohi kaei kaba la jia ha Assam ha ka por u Tarun Gogoi, u la wanrah ia ka ULFA sha ka miej jingiakren bad ka Assam ka la kiew shaphrang bad kala biang mynta. Kumjuh hapdeng kane ka por ba ka Congress ka dang don ha ka por, ngi la pyrshang ban pynduna ia baroh ki kam lehnoh, ngi la wanrah ia ka jingsuk hynrei mynta sa shisien pat wat hapdeng kine ki sienjam kane ka sorkar BJP kam shym la shim khia halor kane ka bynta bad ka long kaba sngew bynniaw shibun.”

Haba ai ka jingkyrshan ba pura halor ka jingiakren iasuk, une u nongialam Congress u la ong, “Nga ai ka jingkyrshan ba pura ia ka jingiateh jingsuk wat hapdeng kino kino ki kyndon, ki briew jong ngi ki dang khyndiat eh ngin ym lah ban shu duh noh iala ki jong ki para shynrang bad kynthei tang namar ki ktang suloi, ngim dei ban duh noh ia ka jingsuk tang namar ka jingdon jingsngew ne tang namar ka ego, ngim lah ban duh noh ia ka jingsuk tang namar ki briew hapoh ka BJP kim shym la patiaw ha kaba iadei bad ki nongshong shnong ka Meghalaya.”

Ha kajuh ka por une u nongialam Congress u buh ruh ka jingkyrpad ia ka seng HNLC ba kan ym weng noh na ka jingiakren iasuk.