Mih paidbah ka shnong Nongsning bad Umrasong ban dawa khang iaka karkhana Coke

Syllad | The Rising MeghalayaFebruary 17, 2024

Ki nongshong Shnong jong ka Shnong Nongsning bad Umrasong haka 16 tarik Rymphang ki la mih paidbah ryngkat ki lama bad placard ban pyrshah iaka karkhana sain rnga dewiong (Coke) kaba tip kum ka M/S Prisidium Brez kaba don ha khappud ka shnong Umrasong, Nongsning bad Umtyra ba hap hapoh ka Elaka Sutnga, East Jaintia Hills District.

Ha kane ka jingmih paidbah kaba la rah ryngkat ki lama iong bad placard la shim bynta da ki longkmie longkpa bad ki samla shynrang kynthei jong kitei ki artylli ki Shnong.

Ka jingiaid paidbah ka sdang na lad ban leit sha karkhana bad iaid lyngba ka surok khyndew haduh ban da poi ha karkhana kaba jingtei ban pynieng iaka, ka dang iaid shait shait mynta.

Kane ka karkhana ka dei kaba la ioh NOC na ka dorbar shnong Umrasong ha u snem 2022 sa u Bah Edamon Siangshai uba dei trai karkhana uba na ka shnong Nongsning.

U waheh Shnong bathymmai ka Umrasong u Bah Elias Tlang haba kren sha ki lad pathai khubor ula ong ba ka dorbar shnong ka la ai iaka jingmynjur ban seng iaka karkhana coke, hynrei kam shym la tip ba na ka jingwan katei ka karkhana kan kylla long ka jingduhnong iaka shnong ka thaw haka liang ka jingkhuid jong ka lyer ba ki ring mynsiem bad ka jingpynkylla bih noh iaki tyllong um kiba don ha u pud u sam jong ki ar Shnong.

Nakaliang U waheh Shnong Nongsning u Bah Dipsing Bareh ula ong, ha kaba iadei bad kane ka karkhana Coke, na ka liang ka Dorbar shnong Nongsning ka la dep ban buh ki jingujor naduh u snem 2022 sha u Deputy Commissioner ka East Jaintia Hills bad kiwei kiwei ki tnat ba dei khmih ia kane ka kam ba ym dei ban ai license ban seng ia kane ka karkhana namar ka pynjot iaka lyer bad mynta ka pynjulor wat ia ka tyllong um jong kane ki ar Shnong.

Ula iathuh ba ki nongshong Shnong ki kyndit ban iohi iaka jingsdang pyntrei ia kane ka Coke wat hapdeng ki jingujor pyrshah iaki, bad katkum ka jingtip jong ka Shnong ula iathuh ba iaka CTE ban tei ia kane ka karkhana ha katei ka jaka la ioh ha u snem 2023.

Ula iathuh ba ka tyllong um ba jan tam na kane ka karkhana Coke kadei ka Umthlu kaba jngai tang 100 lane 200 mitar, bad kawei pat ka tyllong um kadei ka Umdathli kaba jngai duna shi Kilomitre katba ka jingjngai jong ka Coke na ka Shnong Nongsning bad Umrasong ka long shi Kilomitre. Ula ong ba baroh ar tylli kine ki tyllong kila shah ktah na ka jingwan kane ka karkhana sain rnga dewiong.

Kumta baroh ar tylli kine ki dorbar shnong kila dawa ban pynduh pyndam noh shisyndon ia kane ka karkhana namar ka pynjulor ia kine ki tyllong umbam umdih bad lada duh kine ki tyllong um ki Shnong kim don tyllong um shuh da kiwei.

Ha kaba iadei bad ka jingktah jong kine ki tyllong um ula ong naduh u 2022 marsien sdang ka jingtrei ia kane karkhana ki tyllong um ki shah ktah khamtam haka por slap, ka um ka kylla rong na ka jingtuid jong ki khyndew.

Ha kane ka juh ka sngi, u Member Secretary jong ka MSPCB u Dr. GH. Chyrmang MFS ula wan hiar sha ka shnong Nongsning ban jurip iaka jinglong jingman jong ki tyllong umbam umdih ba pyndonkam da ki artylli ki dorbar Shnong ka Nongsning bad Umrasong, East Jaintia Hills District.

Haba kylli iaka jinglap jingshem jong u, u Dr. Chyrmang ula ong ba ia mynta ym pat lah ban ong eiei namar ka jingtohkit ka dang iaid shakhmat.

Ha kaba iadei bad ka jingpyntrei iaka jingtei ia kane ka karkhana ula ong ka jingtrei kan hap ban sangeh shipor katba dang ka jingtohkit ka dangiaid.