Mih paidbah ki khynnah skul, ki paidbah bad ka FKJGP ban dawa kem ia u Dolloi Nartiang ba shah kynnoh lehbeijot

Syllad | The Rising MeghalayaDecember 9, 2020

Ki khynnah skul, ki riew paidbah kynthup iaki longkmie longkpa bad ka kynhun jong ka FKJGP Nongjngi Unit kila mih paidbah ban iaid paidbah ha Nongjngi bad rah iaki jingthoh pynrem ia u dolloi ka Nartiang, u Hepsing Dhar uba shah kynnoh ban lehbeijot ia kawei ka longkmie mynta ka sngi.

Ha kane ka jingiaid paidbah jong ki khynnah skul, ki paidbah bad ka FKJGP kila rah da ki jingthoh ban dawa naka aiñ ban ai ka jingbishar kaba hok iaka longkmie kaba shah lehbeijot bad ban kem mardor ia u Dolloi ka Nartiang.

Kumban shu pynkynmaw kawei ka longkmie haka 3 tarik une u bnai mudui da ka ejahar ha khmat ki Pulit Nartiang pyrshah ia u Dolloi Nartiang u Hepsing Dhar uba dei u kobiraij ula leh beijot iaka haka 30 tarik u Naiwieng haka por ba u wan ai ‘nasip’ iaka longiing jong ki.

U dolloi Nartiang, u Hepsing Dhar ula shah set phatok teng halor ka jingshah kynnoh ban leh beijot iaka longkmie kaba wan shim dawai na u na Mukhla ha u snem 2018.

Nalor kane kawei pat ka mukotduma ka dei halor ka jrong kti jong u ia kawei pat ka khynnah kaba ki Pulit jong ka Jowai PS kila pyngngat ia u haka POCSO Act.

Haduh bala thoh iaka khubor ki Pulit jong ka West Jaintia Hills kim pat ioh kem satia ia une u dolloi.