Mih paidbah ki nongshong shnong ka Lumshnong ban kyrshan tylli ia u ma Grimlang Dkhar kyrtong Congress

Syllad | The Rising MeghalayaJanuary 21, 2025

Kumba ju long haki elekshon kiba la dep, ki dorbar shnong bapher bapher ki ju wan shakhmat ban pynpaw iala ka jingkyrshan iala ki kyrtong bad ha kane ka kynti, ka Dorbar shnong Lumshnong kala pynpaw ban ai ka jingkyrshan kaba pura ia u Ma Grimlang Dkhar ha kane ka election MDC sha JHADC na party Congress na 28- Narpuh Constituency.

Ia kane ka rai ka Dorbar Shnong Lumshnong kala shim haka jingialang kyrpang kaba la long haka 20 tarik Kyllalyngkot ha Community Hall Lumshnong.

Iaka jingialang la pyniaid da u Waheh Shnong Ma Monlang Ladong haka jingdonlang u Assistant Waheh Shnong Ma Change Rymbai, Assistant Secretary shnong Ma Deibor Dkhar ryngkat ki nongshong shnong kynthup naduh ki longkmie longkpa, ki samla shynrang bad kynthei jong ka shnong.

Ha u kyrwoh ba la phah da u General Secretary shnong Lumshnong Ma Embhalang Lamare, ula ong ba ka Dorbar da kawei ka sur la shim iaka rai ban ai ka jingkyrshan kaba pura ia u Ma Grimlang Dkhar kum u kyrtong MDC na ka shnong Lumshnong.

Ka Dorbar Shnong kala ai ruh ka jingkitbok kitrwiang ia u Ma Dkhar ba un ioh ka met kaba koit bakhiah khnang ba un lah ban iaid lynti bad ban ioh iaka jingjop don burom lyngba ka jingkyrshan jong ki paidbah.