Mih pyrshah sa ka shnong Khanduli Lapangap halor ka jingthmu shna surok bad skul bah ka Assam

Syllad | The Rising MeghalayaJune 28, 2021

Ka jingialang jong ki ar shnong ka Khanduli-Lapangap haka sngi Nyngkong 28 tarik Jylliew kila pynpaw ka jingpyrshah kaba jur halor ka jingthmu jong ka sorkar Assam ban shna surok, skul bah ha khappud West Karbi Anglong, Assam bad West Jaintia Hills Meghalaya.

Nakaliang ki jaidbynriew Karbi ki ong ba ka jaka ka hap ha Langkeroi, katba na nakaliang ki shnong ha Khanduli-Lapangap ki hap hapoh u pud u sam ka Jylla.

Ka jingialang jong kine ki ar shnong la iadonlang u waheh shnong Lapangap u Deimonmi Lyngdoh, u Waheh shnong Khanduli u Y Nongspung nalor u Pyrkhat Pyrphet, Chairman Lapangap Khanduli Border Area Joint Action Committee nalor kiwei kiwei.

Kine ki ar tylli ki shnong kila pynrem bad pyrshah jur iaka jingthmu jong ka sorkar Assam ban shna iaka skulbah ne University, ban shna surok na Lapangap sha Khanduli bad thung ia u mawpud hapoh ka Area shnong Khanduli-Lapangap khlem ka jing tip jong ka sorkar Meghalaya, JHADC bad ka Dorbar Shnong.

“Kane ka jingleh Jong ka Sorkar Assam khlem pep kan wanrah iaka jingiakynad, ia khajia bad ka jingsngewpher jaidbynriew nalor ka jingsyier haka leit ka wan ki nongshong shnong. Ngi la rai ban iakynduh biang ia u Deputy Commissioner, West Jaintia Hills ban dawa tuklar mardor ban lait na ka jingshah klun jaka,” la ong u Pyrkhat Pyrphet.

Shuh shuh ha kaba iadei bad kane ka KSU Lapangap kala ujor sha u DC hadien ka jingwan jurip Myntri ka Sorkar Assam, Rupsing Teron, MLA Boithalangso LAC nalor kiwei kiwei haka 22 tarik ia ki jaka khappud bad kynnoh ba ka Meghalaya kala kyntur pud bad pynpra iaki mawpud ha katei ka jaka.