Mih pyrthei ka klob ialehkai kiew lum ha West Jaintia Hills

Syllad | The Rising MeghalayaJune 30, 2020

U Assistant Director jong ka Sports bad Youth Affairs ka Sorkar Meghalaya, Bah Peace Marbniang u la wan ban plie iaka klob ialehkai Adventure Sports and Mountaineering kaba la tip kum ka West Jaintia Hills District Adventure Sports and Mountaineering Club (WJHDAMC) haka shnong Mustem, West Jaintia Hills District haka sngi ba Ar.

Ka jaka treikam bad ka jaka hikai kane ka klob ka long naka shnong Mustem, West Jaintia Hills.

Kum ka dak ban plie paidbah ia kane ka klob la pynher ia ka lama jong ka haka jingialang kaba pyniaid da u Bah Mutshwa Thabah, ha jingiadonlang u President ka Club u bah Sambor Surong, u Waheh Shnong Mustem ma H Shylla, Secretary ma B Bang bad kiwei de ki dkhot ka klob.

U Bah Marbaniang haba kren u la ai ka jingiaroh ia u President ka Club ba lyngba ka jingtrei shitom jong u la lah ban seng ne wanrah ia kane ka klob hapoh kane ka District. Ula ong ruh ba wat la u Sambor Surong u la ioh bun ki khusnam bapher bapher ha ka jingiadei bad ka jingioh pyllait im jong u ia ki para kiew lum, hynrei um shem sngew sarong u la sam bad ai pynban ia kane ka sap bad ka jingstad jong u sha kiwei ban pynshlur iaki ban ialehkai ha kum kane ka jait jingialehkai.

U Bah Marbniang, ula kitbok kitrwiang bad kyrkhu kyrdoh ia kane ka klob ba kan iai kiew sha khmat ha ka kam ialehkai bad ban pynmih ki khlur ialehkai na kane ka klob.

U Sambor Surong u la ong ba lyngba kane ka klob kin ai ka jinghikai iaki samla kiba angnud ban ialehkai haka adventure sports bad mountaineering. “Da ka jingdon kane ka klob nga kyrmen ba ki khynnah bad samla kane ka thain kin ioh ka lad ban pynpaw sha ka pyrthei iaka sap ka phong jong ki bad ban ieng hala ki jong ki kjat,” ong u Sambor.

Hadien pat la pynlong iaka jingthung dieng ha kane ka shnong.