Mih ryntih u paidbah ban rakhe iaka 75th Independence Day ha Jowai | Pule iaki kam pynroi ka sorkar

Syllad | The Rising MeghalayaAugust 15, 2022

U paidbah nongshong shnong ka Jowai, ula mih ryntih ban snohktilang bad ka ri baroh kawei ban rakhe iaka 75th Independence Day ha Jowai kaba la long ha madan Jrisalein, Chuwakhu haka sngi Nyngkong.

Ka jingrakhe kala long kaba phuh kaba phieng bad u paidbah na kylleng ka sor Jowai bad ki shnong ba marjan kila wan sakhi nalor ki shakri sorkar na ki tnad bapher bapher.

U Myntri ka tnad Transport ula kyntiew iaka lama lai rong ka ri bad shim ruh iaka salute.

Ha ka parade ki don ki don haduh 32 tylli ki kynhun ba iashimbynta kynthup ki Pulit, ki skul bapher bapher nalor ki NCC, Bharat Scout and Guide. Ban pynphuh ia ka jingrakhe iaka sngi laitluid ka ri kala don ka jingrwai jingshad tynrai kaba la shimbynta da ki khynnah skul bad skul bad college.

Ki skul kiba jop haka march past ki kynthup iaka QC Springside HSS, Police Public School bad ka Little Flower HSS.

Ka jingkren Independence Day 2022 kaba la pynkhreh da ka sorkar Jylla:

Ki para nongshong shnong baieit jong nga,

Ha kane ka sngi khraw jong ka jingdap 75 snem ka jingioh laitluid ka India ia kaba ngi rakhe kum ka Azadi ka Amrit Mahotsav, nga ai ka jingkhublei ia phi ki paid nongshong shnong ka Meghalaya. Kane ka long ruh ka snem ka ban sahkynmaw ia ka jylla Meghalaya baieit jong ngi kaba rakhe ia ka jingdap 50 snem ka jingioh ia la ka jylla bapura. Ka jingioh laitluid ka India ka pynkynmaw ia ngi ia ka jinglen lade jong ki khlawait kiba ieng ha ka nongrim jong ka jingialeh khlem ka jingiaumsnam. Nga shim kane ka kabu ban pynpaw ka jingsngewnguh ia ki radbah jong ka ri kum u Mahatma Gandhi, Jawaharlal Nehru, Sardar Vallabhai Patel bad Subhas Chandra Bose kiba lam lynti ban pynioh ia ka ri synshar paidbah kaba khraw tam ha ka pyrthei. Ngi kynmaw ruh da ka jingsarong ia ki jingnoh synniang jong ki khlawait ka jylla jong ngi, U Tirot Sing, U Kiang Nangbah bad Pa Togan Sangma kiba la aiti bad len lade na ka bynta ka jinglaitluid jong ngi.

Ha kane ka sngi khraw, nga ai ka jingburom bad jingsngewnguh ia ki riewshlur na ka tnat shipai, paramilitary bad ki pulit kiba la pha ia la ka jingim ban iada ia la u pud u sam, ban bat skhem ia ka jinglong trai bad ban iakhun pyrshah ia ki kam lehnoh.  

Para nongshong shnong jong nga, ha kine ki khyndiat bnai, ka jylla jong ngi ka la mad ia ka jingshah lyngshop kaba shyrkhei ha ki bor ka mariang. Ha kum kane ka sngi, nga phah ka jingsngewlem sha ki bahaiing jong kito kiba la duh ei ia la ka jingim na ka jingshlei um bad jingtwa khyndew ha kylleng ki bynta jong ka jylla. Nga iasngew pangnud lang bad kito ki longing kiba la duh ia la ki iing ki sem na kane ka jingshah lyngshop. Ki Deputy Commissioner bad ki bor distrik jong ngi ki la pynstet ia ki lad ai jingiarap sha kito kiba shah ktah. Ka sorkar jylla da ka jingiarap jong ka Indian Air Force ka la pynpoi ia ki tiar ai jingiarap kynthup ia ka marbam sha kito ki shnong kiba la shah ktah jur tam ha South Garo Hills bad South West Khasi Hills.

Ka jinglong jingman ha ka jylla jong ngi ka long kaba shongsuk shongshngain. Ka long ka man ha khappud Assam-Meghalaya ka long kaba shongsuk lait noh katto katne ki jingialeh markynti ia kiba ki bor distrik bad ruh ka sorkar ki la lah ban pynbeit mar mar. Ka sorkar jong nga ka la mynjur ban mang ia ka Police Infrastructure  Renovation Fund na ka bynta ban maramot bad pynbha ia ki iing pulit kum ki Police Station, Fire Station bad Battalion Headquarters. Ban pynkloi ia ka jingpyntreikam la thung ia ka District Level Committee ban khlieh da ki Deputy Commissioner bad ki Superintendent of Police kum ki Member Secretary. Mynta ka snem, la mang 50 lak tyngka sha man ki distrik ban pynbiang ia ki jingdonkam.

Nga sngewkmen ban iathuh ia phi baroh ba ha ka jingjia ka ban sah nam ha ka histori, ka HNLC ka la pynpaw ia ka jinglahkloi jong ka ban wan sha ka miej ka jingiakren khlem da buh kyndon bad ka ban iaid katkum ka Riti Synshar ka India. Ka jingiakren iasuk ka la sdang bad ka sorkar jylla ka angnud ba ka jingiakren kan kut kloi por ban wanrah ka jingsuk kaba shirta ha ka jylla. Ngi pynpaw ka jingsngewnguh ia ka Sorkar India kaba la kyrshan ha ka ban sdang bad pyniaid shakhmat ia ka jingiakren.

Ka sorkar jylla ka la shim ia ki lad baroh ban pynbeit ia ka jingiakajia khappud hapdeng ka Meghalaya bad Assam. Hadien kiba bun ki jingiakynduh hapdeng ki Myntri Rangbah, baroh ar ki jylla ki la mynjur ban pynbeit hynriew tylli ki jaka na ki khatar tylli kiba don ka jingiapher jingmut, kata, ka Tarabari, Gizang, Hahim, Boklapara, Khanapara-Pillangkata bad  Ratacherra. Ki Regional Committee ba khlieh da ki Myntri Sorkar ki la leit ban jurip lang ia kine ki hynriew tylli ki jaka ryngkat bad ki dkhot ka Regional Committee na Assam. Ki la iasyllok ruh bad ki briew kiba sah ha kito ki shnong, ki khlieh nongsynshar shnong, ki District Council bad kiwei kiba iadonbynta ha ka jingpynbeit pud. Na ki kaiphod jong ki laitylli ki Regional Committee, la lah ban soi ia ka MoU hapdeng ka Assam bad Meghalaya ha ka jingiadonlang jong u Myntri Korbar Ri ka Sorkar India ha New Delhi ha ka 29 tarik Lber, 2022. Ban pyniaid shakhmat ia ka kam, ki heh jong ki ar jylla ki la pynlong ka jingjurip ia ki hynriew tylli ki jaka da ka jingiarap lang ka Survey of India.

Ka sorkar jong ngi ka la shim ruh bun ki sienjam ban kham pynbha ia ka synshar khadar. Ka projek Meghalaya State Enterprise Architecture (MeghEA) ka dei ka policy ka ban saindur thymmai ia ki tnat treikam jong ka sorkar Meghalaya ban kham pynsuk ha ka jingtreikam bad ki paidbah, ha ka khaii pateng bad ki jingai jingshakri jong ka sorkar. Naduh ka 1 tarik Iaiong, 2022, ia ka jingmang phon pisa da ki tnat treikam ka sorkar jylla la pyniaid lyngba ka eProposal System kaba la pyniasnoh lang bad ka Finance Department kum ka Budget Estimation and Allocation Management System (BEAMS), eBill bad Treasury NET. Ka jingsdang jong kine ki jingpyniaid kam ka la iarap ban pynstet ia ka jingtreikam kum ka jingai jingmynjur, ka jingmang pisa bad ka jingpyllait ia ka phon pisa. Kane kan pynmyntoi ia ki paidbah haba ngi lah ban mang pisa kham kloi ia ki skim. Kane ka jingpyrshang ka la ioh jingithuh ruh ha ka pyrthei baroh kawei bad ka eProposal System ka la ioh ia ka United Nations World Summitt on the Information Society Award 2022 ha ka liang jong “Ka kamram ka sorkar bad kiwei ha kaba kyntiew ia ki ICT na ka bynta ka roi ka par”. Ia kane ka khusnam la pdiang da u Myntri Rangbah ka jylla ha ka 31 tarik Jymmang, 2022 ha Geneva.

Ka sorkar jong ngi ka la banjur ruh ia ka jingdonkam ban kham pynbha ia ki lad shakri paidbah bad ban pynstet ia ki jingpyntreikam ia ki prokram bapher bapher. Dang shen, ngi la lah ban sdang ia ka web portal ban iarap ia ki paidbah ba kin ioh ia ki jingshakri online bad ban phah ia ki appeal katkum ka Meghalaya Right to Public Services Act, 2020. Hapoh ka Aspirational District Programme, nga sngewkmen ban pyntip ba ka distrik Ri Bhoi ka la ioh ia ka kyrdan balai ha ka Delta Ranking jong baroh ki Aspirational District jong ka ri ha u Rymphang 2022.

Na ka bynta ka rep ka riang, la sdang pyntreikam ha ka snem 2021 ia ka FOCUS ne ka Farmers’ Collectivization for Up-scaling of Production and Marketing Systems da ka jingthmu ban kyntiew ia ka jingpynmih mar, kyntiew ia ka jingseisoh, iarap ban pynioh ia ki ram bad ban pynkhlain ia ki jingpyniaid iew na ka bynta ki nongpynmih mar kiba trei ha ka kam rep, ri jingri bad kiba kum kita. La ai jingkyrshan pisa haduh shi lak tyngka sha ka kynhun ki nongpynmih mar kiba la seng kum shibynta jong ka prokram. Ka thong jong ka prokram ka long ban pynpoi ia ki jingmyntoi sha baroh 4.5 lak ki longing nongkyndong ha ka jylla. Nga sngew hun bad sngewkmen ban iathuh ba tang hapoh shisnem shiteng, ka prokram ka la ai jingmyntoi kumba lai lak ki longing bad la khmih lynti ba ha kine ki laibnai ban wan, ngin sa lah ban pyndep lut ia baroh ki longing nongkyndong ha ka jylla. Ka dei ka prokram kaba heh tam ha ka liang ka rep ka riang ha ka histori jong ka jylla. Ka FOCUS ka la thawdur thymmai shisha ha ka liang ki jingtreikam bad kyntiew ia ka ioh ka kot ha ka jylla. Ka prokram ka kynthup ia baroh ki nongpynmih mar ym tang kito kiba donkti ha ka kam buh pharm bad ri jingri hynrei ruh kiba trei ha ki kam thain ksai bad ki kam trei kti. Namar ka jingjop jong ka prokram, ka sorkar dang shen ka la sdang ia ka FOCUS+ ban nang pyniar shuh shuh ia ka prokram FOCUS. La saindur ia ka FOCUS+ prokram ha kata ka rukom ba ka jingmyntoi kan poi sha kawei pa kawei ka longing ha nongkyndong. Kum shibynta jong ka prokram, yn ai phon pisa 5000/- shisnem sha man ka longing nongkyndong ban kyntiew ia ki lad treikam jong ki kum ka rep ka riang bad kiwei.

Shuh shuh, ban pynsuk ia ka kit ka bah ia ki mar-rep, ka sorkar ka la pyllait ia ka Meghalaya Agriculture Response Vehicle Scheme kaban ai jingiarap pisa 50% sha ki 200 ngut ki nongioh myntoi kiba la shah jied ban thied ia ki kali ban pynkit ia ki marrep. Ka sorkar ka la pynhiar shuh shuh ia ka sut sha ka 2% sha ki nongshim ram lyngba ka KCC bad da kane ka jingpynhiar, ka sut na ka bynta ki nongshim ram KCC ka la poi sha ka 0 percent. Ka jingpynhiar jong ka sorkar jylla ia ka sut da 4% kan treikam naduh ka Snem Mang Tyngka 2021-2022 bad ki nongshim ram KCC kin nym donkam shuh ban siew sut ia ki ram KCC.

Ban kyntiew ia ka kam shna jingbam, ka North East Food Show ba-ar ka la long ha u Jymmang 2022. Ka jingpyni nam mynta ka snem ka kham phai khmat sha ki nongseng kam lajong kiba trei ha ka kam shna jingbam bad ka jingkyntiew ia ki wain ba shna na ki soh, shynrai Lakadong bad ki marrep bym ai dawai. Palat 240 ngut ki nongiashim bynta bad 100 ngut ki nongthied na India bad nabar ri ki la shim bynta bad la ong ba kane ka dei ka Food Expo kaba heh tam ha kane ka thain. Hapoh ka Mission Jackfruit, la sdang ia ka Techno Incubation Centre ha Institute of Hotel Management, Shillong ha u Jymmang 24, 2022. Ka Centre ka thmu ban wad ki lad ki lynti ban pynmih ia ki marbam kiba bha bad iaid dor kiba shna na u Sohphan ban pynmyntoi ia ki nongrep bad ki nongseng kam lajong.

Sa kawei ka khana jingjop ha ka kam rep ka dei ka Meghalaya Livelihood and Access to Markets Project. Kane ka dei ka projek kaba radbah kaba la pyntreikam ban kyntiew ia ka kam shalan ia ki marrep, ki soh ki jhur bad ki mar khlaw bad ban buh ia ki jaka pyniaid iew bad pynioh ram ia ki nongrep. Kane ka projek ka la wanrah ka jingkylla kaba khraw ha ka ioh ka kot jong ki thain nongkyndong, khamtam ha ka jingpyniaid iew ia ki marrep. Hapoh ka projek, la lah ban seng kumba 330 tylli ki cooperative society kaba kynthup ia kumba 50,000 ngut ki nongrep. La ioh ban tei sa 80 tylli ki iew dielang. Ia kine ki iew la long trai bad pyniaid da ki nongrep bad ka la khanglad ia ka jingshim kabu jong ki briew kiba pyniaid iew ia ki marrep ha ka jylla. Shuh shuh, kum shibynta jong ka projek la lah ban tei 20 tylli ki iew nongrep kiba heh. Namar ka jingjop jong ka projek ha kaba thawdur thymmai ia ka ioh ka kot ha nongkyndong, ka Sorkar India bad ka agency bei tyngka ki la mynjur ban ai tam sa 150 klur ka grant. Kane ka long shisha ka jingsarong kaba khraw ia ngi baroh bad ka long ka sakhi ia ka jingtrei shitom jong ka sorkar.

Ka kam ri jingri ka don ka bynta kaba kongsan ha ka ban pynbiang ia ka bam na ka bynta ki paidbah ka jylla. Ka jingri sniang, ri syiar, ri blang bad ri masi bad kiwei ki jingri ka pynbiang ia ki jingbam kiba riewspah ha ka protein na ka bynta ki paidbah ka jylla jong ngi. Namar ka jingjur ka jingdawa ia ka doh bad ki jingbam ba shna na ka doh, ka Animal Husbandry & Veterinary Department ka la lah ban pyrshang da ka jingjop ban pynkha ia ki masi HF Breed ha Indo-Danish Project, Upper Shillong. Nga sngewkmen ban iathuh ia phi ba ka sorkar jong ngi ka la phai khmat kyrpang kumno ban kyntiew ia ka ioh ka kot jong ki longing kiba duk tam da kaba ai jingiarap da ki jingri kiba shongdor kumba 10,000 tyngka ia kiba la jied da ki Village Employment Council lyngba ka tnat C & RD. La mang 15 klur tyngka ia ka Livestock Package Scheme.

Ha kaba iadei bad ka kam ri dohkha, ngi iohi ba ka jylla ka la kiew bun shah ha kaba pynmih dohkha na ka 4,799 MT ha ka snem 2011-12 sha ka 18,235 MT ha ka snem 2021-2022. Ka tnat Fisheries ka pynthikna ia ka jingdon jong ka pisa na ka bynta ki paidbah khnang ban kham pynbun ia ki pung dohkha lyngba ka jingpyntreikam ia ka Pradhan Mantri Matsya Sampada Yojana (PMMSY) bad ka Meghalaya State Aquaculture Mission 2.0. Namar ngi iohi ia ka jingtrei shitom bad ki jingma kiba ki nongrep ki iakynduh ha kaba iadei bad ka kam ri dohkha, ka tnat ka la pynrung 1,013 ngut ki nongri dohkha hapoh ka Group Accident Insurance Scheme-Pradhan Mantri  Matsya Sampada Yojana.

Kum ka jylla kaba la kyrkhu da ka spah mariang bad ki khlaw ki btap, ka long kaba donkam ban shim ki lad ban tyngkai bad pyniaid ha ka rukom kaba dei ia ki mar pohkhyndew bad ka jingpynroi ia ki khlaw ki btap. Ka tnat Soil & Water Conservation ka la sdang ban shim ia ka sienjam ban iada ia ki jaka tuid um bad pynkhieim ia ki jaka sah shrah ban ialeh pyrshah ia ka jingkylla syndet ka mariang da kaba pynlong ki prokram tyngkai ia ki dieng ki siej da kaba thung 2.5 milian ki dieng, kynthup ia ki dieng soh, ha ki 466 tylli ki shnong ha baroh ki distrik ka jylla. La lah ruh ban pynlong ia ki prokram pynsngewthuh kumno ban iada ia ka spah mei mariang ha ki 6689 tylli ki shnong bad ai jinghikai ia 20,067 ki Village Community Facilitator. Haduh mynta, 3638 tylli ki shnong ki la don jingtip halor kane ka phang bad la lah ruh ban ai jinghikai ia 7045 ngut ki Village Community Facilitator.

Ka Meghalaya ka dei kawei na ki jylla ba riewspah tam ha ka ri ha ka liang ka jingdon ki khlaw bad ki spah meiramew. Ban pynkhlain bad pynroi ia ki jaka khlaw ha ka jylla, ka tnat Forest ka la thung dieng kumba 769 haktar hapoh ki skim bapher bapher ha ka snem 2021-2022. Ban pynsboh bad pynbha biang ia ki thain ba don par dewiong ha Khasi Hills, Jaintia Hills bad Garo Hills, la thmu ban thung dieng ha 416 haktar hapoh ka Meghalaya Environment Protection and Restoration Fund ha ka snem 2022-2023. Ha ka snem 2021-22, la buh 7 tylli ki Community Reserves bad haba khein lang ka la poi sha ka 81 tylli ha kaba ka khlaw shnong mynta ka la poi sha ka 6,810.798 haktar.

Ha ka liang ka koit ka khiah, ka sorkar ka la shim ki lad ban pynjanai ia ki jingai jingsumar bad ruh ban pynbha ia ki jaka sumar. Ka sorkar ka la wanrah da ka Chief Minister’s Safe Motherhood Scheme ban ai ka jingshakri kaba janai ha ka liang ka koit ka khiah ia ki longkmie bad ki khunlung rit. La dep ban pyllait 4.46 klur sha ki Community Health Centre bad ki Primary Health Centre ban pyniaid ia ki kam hapoh ka skim. Khnang ban pynshlur ia ka jingshimbynta jong ki paidbah ban pynbeit ia ki jingeh kiba iadei bad ka koit ka khiah ha ki shnong, ka sorkar jylla ka la shim lad ban thung ia ki Village Health Council (VHC). Ha kane ka lyngkhuh snem ba 50 ka jingioh ia la ka jylla, la lah ban plie ia ki katto katne ki projek kiba kynthup ia ka Diagnostic Centre bad Paediatric Intensive Care Unit ha Ganesh Das Hospital, ka Civil Hospital ba 100 jingthiah ha Khliehriat, East Jaintia Hills bad GNM Nursing School ha Nongstoin.

Ka Meghalaya ka dei ka jylla kaba nyngkong eh ha ka ri ban sdang ia ka Early Childhood Development Mission ban pynthikna ba ngi lah ban pynbeit ia ka jingeh kaba iadei bad ka jingduna bam ki khunlung kaba dei kawei na ki daw ba ngi don ha ka kyrdan kaba sha trai ha ka Sustainable Development Goals Index. Ia ka Mission la pyllait paidbah da ka Myntri Women and Child Development jong ka Sorkar India, ka Smriti Irani ha ka 8 tarik Jylliew, 2022 ha Shillong. Ka thong jong kane ka Mission ka long ban pynkhlain ia ki lad sumar ia ki khunlung kiba hapoh ka karta 0-8 snem bad ban kyntiew ia ka khie ka san jong ki khunlung bad ruh jong ki longkmie.

Ha ka liang ka pule puthi, ka sorkar jylla ka la sdang ban pyntreikam ia ka National Education Policy 2020 wat hapdeng ki jingeh kiba bun. La dep ruh ban thung ia ka Curriculum Advisory Group bad State Consultative Committee halor ka Early Childhood Education. Ban pynbha ia ki iingskul, ka sorkar jylla ka la kyrshan ia 208 tylli ki skul da ka jingmang tyngka kaba 109.33 klur ha ka Phase I. La phah jingtyrwa ruh ban mang pisa 100 klur na ka bynta 111 tylli ki skul ha ka Phase II bad 86.76 klur na ka bynta 1878 tylli ki skul ha ka Phase III lyngba ka jingbei tyngka jong ka jylla. Ha kaba iadei bad ki jingpule ba kham shalor, la khmih lynti ban pyndep hapoh u Nohprah 2022 ia ka Shillong Government College of Engineering, Shillong, College of Architecture and Urban Planning, Tura bad Captain Williamson Sangma State Technical University.Ka jingtei ia ki Model Degree College ha Patharkhmah bad Rongjeng ka la jan dep bad ka sorkar jylla ka la mynjur ban thung kam ha kine ki kolej.Ka jingkyntiew bad jingpynbha ia ki laitylli ki kolej sorkar ha Baghmara, Sohra bad Williamnagar la khmih lynti ban pyndep ha u Rymphang 2023. Ban kham pynjanai ia ka jingpule ain, ka sorkar jylla dang shen ka la mynjur ban buh ia ka National Law University ha ka jylla ban tip kum ka National Law University Meghalaya.

Nga sngewkmen ban iathuh ia phi ba dang shen lai tylli ki kolej sorkar ha Jowai, Tura bad Sohra ki la ioh jingithuh na ka National Assessment and Accreditation Council. Ka sorkar jylla dang shen ka la kyntiew ia ka jingai jingiarap ha ka dur ki grant na ka bynta ka tulop nonghikai Adhoc ha ki Higher Secondary, Secondary, Lower Primary, Upper Primary, nonghikai bathung ka tnat Education (Fourth Teachers), nonghikai Science bad Hindi.

Ka jingpynbiang ia ki surok kiba bha ka wanrah ka roi ka par ia ki paidbah. Ha ka snem mang tyngka 2021-2022, la lah ban shna 117 km ki surok thymmai, 110 km kiba la kyntiew sha ki surok kiba neh ha baroh ki aiom bad 497 Rm ki jingkieng dieng la pynthymmai sha ki jingkieng dewbilat. Ha kane ka snem mang tyngka 2022-23, ka thong ka long ban shna 60 km ki surok thymmai, kyntiew ia 127 km ki surok kiba don sha ki surok kiba neh ha baroh ki aiom bad pynkylla ia 1828 Rm ki jingkieng dieng sha ki jingkieng dewbilat. Hapoh ka North East Special Infrastructure Development Scheme la mynjur ia artylli ki projek surok kiba heh, kata ka jingpynbha bad pyniar ia ka surok Agia-Medhipara-Phulbari-Tura bad ka jingshna ia ka surok na sorbah Shillong sha kad liengsuin Umroi. Ka jylla ka la pyniaid shaphrang ha ka jingpyntrei ia ka skim PMGSY. Hapoh ka PMGSY-I bad PMGSY-II, ka jingshna surok kaba la mang ha Meghalaya ka long 1174 tylli ha ka lynter kaba 4,755.19 km. Na kine, la lah ban pyndep 858 tylli ki surok ha ka lynter kaba 3817.89 km.

Ha ka tnat Power, ka jingtei ia ka Ganol HEP (3 x 7.5 MW) ka la nang iaid shakhmat bad la buh ban pyndep hapoh u Naiwieng 2022 ka ban pynurlong ia ka jingangnud jong ki paid ka jylla. Ia ka Run of the River (ROR) project kaba 3 MW kaba lah ban pynmih bording 17.92 MU ha Riangdo, West Khasi Hills la buh ban pyndep hapoh ka snem 2023. Ka tnat Power jong ka Sorkar India dang shen ka la mang pisa 1092 klur hapoh ka Revamped Distribution Sector Scheme ban bujli bad pynthymmai ia ki LT bad HT Lines, ban pyndait noh da ki Prepaid Metres bad pynkhlain ia ki kor ki bor IT jong ka MeECL. Kane ka dei ia kito ki bynta kiba khlem pynrung hapoh ki skim UDAY bad kito kiba bei tyngka da ka ADB. Shuh shuh, ka State Load Dispatch Centre ka la ioh ia ka ISO Certification na ka bynta ka cyber-security, kaba nyngkong eh ban leh ha kane ka thain Shatei-lam-Mihngi.

Ka sorkar ka la shim khia ban pynthikna ba ki paid nongshong shnong ka jylla ki ioh ia ka umdih kaba biang bad kaba khuid. Tad haduh ka 8 tarik Nailar 2022, ka tnat PHE ka la ring umkor sha 2,47,298 tylli ki longing hapoh ka Jal Jeevan Mission nalor ki 1,30,000 tylli ki kor um kiba la ring ha u Naitung 2021. Nalor kata, na ki 757 tylli ki shnong kiba la ioh lut ia ka umkor ha u Naitung 2021, mynta 1478 tylli ki shnong ki la ioh lut ia ka umkor iing. Kane ka pyni ia ka jingpynurlong ka sorkar ban pynioh ia ka umdih sha man ki thliew iing. Nalor kata la lah ruh ban plie ha ka 29 tarik u Naitung, 2022 ia ka NABL Accredited State Laboratory ban test ia ka um.

Ha ka tnat pynroi sor, ka sorkar ka la pyntreikam bun ki projek pynkhuid niut. Ka jingtrei ia ka Septage Management Plant ha Marten ka la iaid shakhmat. La tei ruh ia laitylli ki Waste Recovery Centres ha Shillong ban pynbeit ryntih ia ka rukom pynkhuid niut kynthup ia ka Waste to Energy Plant ha Tura kaba lah ban pynkhuid 10 ton shisngi. Hapoh ka Shillong Smart City Project, ka jingtrei ka la iaid shakhmat ia ka jingtei ia ka Iew Laitumkhrah, ka Iew Polo, Smart Roads (Phase-1), Integrated Control and Command Centre (ICCC) bad Automatic Car Parking ha Motphran. 

Ha ka kam pynroi nongkyndong, ka MGNREGA ka dang iai trei da ka jingjop. Ha ka snem 2021-22, la lah ban pynmih kam na ka bynta 393.63 lak ki kynta trei hapoh ka MGNREGA kaba tam ia ka 375 lak ki kynta trei kiba la mang da ka tnat Labour. Ka la don ka jingpyrshang ban pyndonkam ia 60% na ka phon pisa ban sumar ia ka mei mariang bad ban tyngkai ia ka um. Ban poi sha kane ka thong, la thaw ia ka Natural Resources Management Committee (NRMC) ha ki shnong ba kin thaw ia ki prokram sumar mariang. Hapoh ka Pradhan Mantri Awaas Yojana (Grameen) (PMAY-G) ha ka snem 2021-22, la lah ban pyndep ia ka jingtei ia 8167 tylli ki iing ha ka jinglut kaba 6910 lak. Hapoh ka National Rural Livelihood Mission (NRLM), la thaw 8663 tylli ki SHG bad la lah ban pyniasnoh 5728 tylli ki SHG bad ki bank ha ka jinglut kaba 62 klur ha ka snem 2021-22. Ki MLA ki la iai bteng ban don bynta bha ha ka Special Rural Works Program (SRWP) ban wanrah ki kam pynroi ha ki thain nongkyndong. Ha ka snem 2021-22, ka sorkar jylla ka la mang 136.25 klur tyngka.

Da ka jingpyllait ia ka One Nation One Ration Card scheme, ki nongiohmyntoi na ka National Food Security Act ki la lah ban ioh ia ki jingmyntoi ka PDS hapoh jong ka NFSA na kano kano ka dukan Ration ha ka ri. Ban pynjanai ia ka PDS ka sorkar jylla ka la ia soi ia ka soskular bad ka United Nations World Food Programme ban kyrshan ia ki jingsdang kum ka jingpyntreikam da ki kor komputor ia ka TPDS, ka jingpynkhlain ia ka jingpynpoi ia ki marbam ha ki TPDS, ka jingpyndonkam ia ka jaka pynlang jingbam bad ka mobile app na ka bynta ka jinglum jingkhein. Ka Tnat ka la wanrah ruh ia ka PDS Control Order 2022 ban pyndonkam ia ki kor ki bor ka juk stad mynta hapoh ka PDS. 

Ha ka tnat Tourism, la sdang ia ka Meghalaya Eco Tourism Infrastructure Project (MEIDP) da ka jingiarap pisa kaba 750 klur tyngka na ka New Development Bank. Ka jingthmu jong kane ka project ka long ban kyntiew ia ka kam jngohkai ba pynneh pynsah ia ka mariang da ka jingshna ia ki resort bad kiwei kiwei ki ban iarap ban kyntiew ia ka lad kamai ki briew bad kumjuh ruh ban kyntiew shuh shuh ia ka kam jngoh kai. La pyllait ia ka Meghalaya Luxury Vehicles Incentive Scheme ka ban ai 50 persen ka subsidy na ka bynta ki kali rem dor. Namar ka jingshitrhem bad jingshim khia jong ki shnong bad ki paidbah, la sdang ia ka bynta ba ar jong ka jingiakob ban pynitynnad ia ki dong ki shnong ha ka jylla ha kaba la dep ruh ban pyllait ia ka pisa sha ki shnong bapher bapher ha Shillong, Tura bad Jowai lyngba ki Deputy Commissioner. 

Ka kam thain jain ka don ia ka bynta kaba khraw ban rat diengkhong ia ka jingduk khamtam ha ki thain nongkyndong namar kane ka la kyntiew shibun ia ka jingai kam ai jam khamtam eh ia ki kynthei. La mang tyngka 2,380 lak tyngka ia ka scheme Development of Textile Industry hapoh ka Silk Samagra II ban ai jingiarap bad ai jingmyntoi ia ki nongthain jain ka jylla.       

Ka sorkar ka la pynkup bor ruh ia ki paid nongshong shnong ka jylla, khamtam ia ki samla da kaba kyntiew ia ka jingsengkam lajong lyngba ka PRIME program. Ki PRIME Hub ha Shillong bad Tura ki dei ki shlem na ka bynta ki jingshem ba thymmai, jingiasam jingtip, bad kyntiew ia ki sap treikam. 50 tylli ki jaka sengkam lajong kiba la ioh jingiarap pisa lyngba Kickstart Grant bad ka Scale up Loan. Shuh shuh la thmu ruh ban buh ia ki PRIME Hub ha man ki district headquarter khnang ban iarap ruh ia ki nongkyndong. Ia kane ka sienjam jong ngi la ithuh da ka Sorkar India ha kaba ka Meghalaya ka la shah jied kum ka jylla kaba ha khmat eh ha ka ri ryngkat bad ka jylla Gujarat bad Karnataka ha ka National Start-up Rankings 2021.

Ban pynshlur ia ki samla ha ka liang ka jingseng ia ki kam IT bad ITeS, ia ka kylla ba nyngkong jong ka Shillong Technology Park la plie ha u bnai Rymphang 2022 ha Umsawli, New Shillong. Ki company ba paw ka ri bad ka pyrthei ki la sdang ia ka jingtreikam jong ki na kane ka Shillong Technology Park. Kane kan iarap shuh shuh ban pynioh kam ioh jam ia ki samla ka jylla. Ka Sorkar Jylla mynta kan sdang noh sa ia ka kylla ba ar jong ka Shillong Technology Park bad la sdang ruh ia ka ki jingpynbit pynbiang ia kane ka project.           

Ka Meghalaya ka dei ka jylla kaba dang lung ha kaba ka jingdon jong ki briew kiba hapoh 35 snem ka rta ka long 74 na ka 100 ka jingdon briew ha ka jylla. Ka sorkar ka la shim ia shibun ki lad ki lynti ban pynkup bor ia ki samla ka jylla. Ka Sorkar Jylla dang shen ka la pyllait ia ka scheme Youth Engagement through Empowered Youth Organisations (YESS Meghalaya) da ka jingthmu ban ai jingiarap pisa haduh 1 lak tyngka ia ki seng samla ban pynkupbor ia ki seng ne kynhun jong ki samla na ka bynta ka jingpyntreikam ia ki programme bapher bapher jong ki.

Ka Meghalaya Youth Engagement and Training Programme lyngba ka  ASPIRE Meghalaya kaba la pyntreikam da ka Tnat Sports & Youth Affairs, ka thmu ban pynkup bor ia ki samla lyngba ki jingai jinghikai  ban kyntiew ia ki sap ki phong. Hapoh kane ka programme palat 65,000 ngut ki samla kiba naduh 14 snem haduh 22 snem ka rta na palat 200 tylli ki skul bad college na baroh 12 tylli ki district ki la ia don bynta ha kane ka programme ban pynjanai ia ki sap ki phong jong ki. Shuh shuh ia kane ka jingai jinghikai ban kyntiew ia ki sap ki phong la lah ban sam lang ruh sha ki 12,000 ngut ki samla ha ki 60 tylli ki campus ha ki 12 tylli ki district.

Ha ka State Level Chief Minister’s Inter School Athletic Meet 2022 kaba la long ha Shillong  naduh 30 tarik Jymmang haduh 3 tarik Jylliew 2022, la sakhi ia ka jingiashim bynta shitrhem jong ki 840 ngut ki nongialehkai na baroh ki district ka jylla. Nga kwah ruh ban ai khublei ia ka kynhun ki rang ialehkai Football ka jylla  kaba la ioh ia ka Takma Rnong ha ka Khelo India Youth Games kaba la long ha Haryana.

Bun tylli ki jingtei na ka bynta ki jingialehkai sports ki ban long kum ha kiwei pat ki ri ka pyrthei ki dang iaid shaphrang ki ba kynthup ia ka JN Stadium Complex, ka P.A Sangma Integrated Sports Complex, Wahiajer Stadium bad ka Crinoline Swimming Pool Complex. Tang shu pyndep ia kine, ka jylla jong ngi ka la bit ban pdiang ia ki lympung ialehkai ha ka kyrdan jong ka pyrthei. Ka Sorkar Meghalaya bad ka Meghalaya State Olympic Association (MSOA) ka la shah jied ban pdiang ia ka Northeast Olympic Games 2022 kaba Ar ha Shillong naduh 30 tarik Risaw 2022 haduh 6 tarik Naiwieng 2022. Ha kane ka lympung ialehkai kin don haduh kumba 2,500 ngut ki nongialehkai ki ban wan iashim bynta na baroh 8 tylli ki jylla ka thain shatei lam mihngi ha ki palat 17 tylli ki jait jingialehkai. Kane kan dei ka kabu kaba khraw eh ia ki nongialehkai ka jylla ba kin pynpaw ia ki sap ialehkai jong ki.

Kum shi bynta jong ka jingrakhe ia ka jingdap 50 snem ka jylla bad ka “Azadi Ka Amrit Mahotsav”, la pynieng ia ki mot dur jong u Tirot Sing, u Kiang Nangbah bad Pa Togan N. Sangma bad kumjuh ruh la sdang ia ka Kiang Nangbah Indigenous Knowledge & Cultural Centre-cum-Tribal Museum ha Jowai. Kum ban shu kdew katto katne ki sienjam kiba la leh ha ki 50 snem ba la leit la sdang ruh ia ka Museum on Wheels. Da ka jingioh jingkyrshan na ka Tnat ki Kam Bar ri ka Sorkar Pdeng la lah ruh ban plie ia ka Tirot Sing Memorial ha Indian Cultural Centre ha Dhaka.

Shwa ba ngan pynkut, nga kwah ban iathuh ba ka Jylla Meghalaya ka iasnoh kti lang bad ka ri baroh kawei da ka jingiashim bynta shitrhem jong ki paidbah ban pynthikna ia ka jingjop jong ka Har Ghar Tiranga Campaign kaba la leh ha kylleng ka jylla.

Sa shisien, nga ai khublei Sngi Laitluid basuk bakmen ia phi baroh ki para nongshong shnong.

KHUBLEI! MITELA JAI HIND!