Mih sa ka kynhun niam ban dawa khang ia ka rally khang shoh doh masi ka seng Hindu

Syllad | The Rising MeghalayaSeptember 30, 2024

Ka Synjuk ki kynhun niam bapher bapher ka Rilum Khasi Jaintia, ka Khasi Jaintia Christian Leaders Forum (KJCLF) ha ka 28 tarik Nailur ka la kyntu ia ka Sorkar Jylla ba kan shim ia ki sienjam ban khanglad ia ka jingthmu pynlong ia ka rally khang shoh doh bad bam doh masi da ka seng Hindu namar kane kan ktah jur ia ka jingsngew jong kiba bun ki nongshong shnong ka Jylla bad kaba lah ruh ban pynthut ia ka shongsuk shongsain.

U Secretary ka Forum, u Rev Dr EH Kharkongor lyngba u kyrwoh u la ong, “Khnang ban pynneh ia ka shongsuk shongsain bad ban kiar ban pynthut ia ka jingiadei ha ka imlang sahlang ka Forum ka khot ia u Myntri Rangbah ka Jylla bad ia ka Sorkar jong u ban shim ia ki sienjam ban khanglad ia kane ka jingthmu pynlong rally kaba long pyrshah ia ka rukom im, ka rukom bam bad ki riti dustur jong ki trai ri trai ri trai muluk.”

U Rev Kharkongor u la kdew ruh ba ki nongkyrshan jong kane ka rally ki dei ki kynhun kiba don shabar ka Jylla Meghalaya da ka jingthmu ba buhrieh kiba pynkhihwin ia ka suk ka sain bad ka jinglong shipara hapdeng ki nongshong shnong ha ka jylla jong ngi.

“Ka la ju long kumta ba ki jingjia kum kine ki pynmih ia ka jingiapher niam, ka jingbym shaniah bad ka jingbym sngewthuh jingmut ryngkat bad ka jinglah ban pynmih ia ka huri hura ha kine ki jaka ryngkat bad ki jingktah naduh ka kyrdan jong ka thaiñ haduh ka ri bad ka pyrthei,” u la ong .

Da kaba pynpaw ba ha ki iew pynmih doh masi ha ka pyrthei ka India ka dei kaba wan ha ka kyrdan kaba saw, une u nongialam ka Forum u la ong, “Kumjuh ruh ka Meghalaya bad ki katto katne ki Jylla ba marjan jong ka ha kaba ka iew khaii bad pynmih doh masi ka dei ka jingnoh synniang kaba khraw sha ka ioh ka kot bad ka rukom im bad rukom bam jong ki trai ri trai muluk.”

“Kumta ka long kaba donkam ia ka Sorkar Jylla bad Sorkar Pdeng ban sngewthuh ba kiba kum kine ki jingpyrshang kin ktah jur ruh ia ka ioh ka kot,” ong ka Forum.