Mih sa kawei ka kynthei na 26 ngut ban bah ïaka lyngkor ban long kum ki referee football ha Jaiñtia

Syllad | The Rising MeghalayaNovember 8, 2019

JOWAI: Haduh 26 ngut ki samla na sor Jowai bad ki shnong ba marjan kila wan ban ïashimbynta haka Referee’s Clinic cum Refresher Course kaba pynïaid da ka West Jaiñtia District Sports Association (WJDSA) bad ka District Administration jong ka West Jaiñtia Hills ban bah ïaka lyngkor ban long kum ki referee ban pyniaid iaka jingialehkai phutbol.

Kine ki 26 ngut kila wan shakhmat ban ïashimbynta  ban ïoh jinghikai bad ban pyntbit ïalade ban long ki referee ban pynïaid ïaka jingialehkai football.

Napdeng kine ki 26 ngut la mih sa kawei ka kynthei ban shah hikai ban long kum ka referee. Kane ka dei ka Jasmine Rymbai kaba na Khimusniang.

Ïa kane ka jingai jinghikai ka WJDSA kala sdang naduh ka 5 tarik bad kala pynkut haka 8 tarik une u bnai ha Kiang Nangbah Stadium.

Ha kane ka referee clinic la wan hikai da ka Riiohlang Dhar Fifa Assistant ha kajuh ka por kaba dei ka Referee jong ka Asian Football Federation bad na u ma Romanium Syngkon Head Referee jong ka WJDSA, u Retd. National Referee.

Ka jingpynlong ka WJDSA ïa kane ka jingai jinghikai kalong ban sam ïaki jingtip bad ki buit ïaki samla kiba angnud ban long ki referee ban pyniaid iaka jingialehkai football haka district.

Kumban shu pynkynmaw baka Riiohlang Dhar ruh ka dei kawei na ki samla kaba la sdang ïaka kam referee jong ka naka lympung ïalehkai ka WJDSA. Hadien kala hiar sha Shillong bad kala nang kiew na uwei u mawjam sha uwei u mawjam mynta kala pyniaid iaka jingialehkai football wat sha bar ri.