Mih sa ki kynthei Khasi Pnar ba rah jri hadien ba nangkhluit ka jingiakynad bad ki Karbi 

Syllad | The Rising MeghalayaSeptember 27, 2023

Ka jingiakynad hapdeng ki Khasi Pnar bad ki paid Karbi ha ka shnong Lapangap kaba don ha Khappud ka Meghalaya Assam, hapoh West Jaintia Hills ka dang iai bteng bad nangkhluit shuh shuh, ha kaba mynta la sakhi sa ia kynthei ba shlur kiba la mih shakhmat ha ryngkat bad ki jri siat sim ban iakhun pyrshah ia ki Karbi.

Hapdeng kane ka jingialeh markylliang la sakhi ruh ia ki bor pulit na baroh ki arliang jylla ba kim shym la lah ban tehlakam bad hap ban shu long tang ki nongpeitkai.

Kane ka jingiasiat jri markylliang ka la sdang naduh mynta ka sngi ha ka por kumba 12:26 nohphai sngi ha kaba la sakhi ruh ia laingut ki nongshong shnong ka Lapangap kiba la ngat ha ka jingmynsaw. Kine kiba la mynsaw ki dei kiba la tip kyrteng kum u Bah Nibait Sariang, Ros Shadap bad u Sangaid Joit.

Kumba la sakhi  na ka liang ki longkmie na Lapangap kila long kiba la pynkhreh ha kaba la iohi ruh ba kila bunkam ha kaba kyllain myllon ban iakhun pyrshah ia ki Karbi.

Kane ka jinglong jingman ka la wan long ruh tang shisngi hadien ba la sakhi biang ia ki kam thombor jong ki Karbi kiba la pyndonkam da ki khnam ki ryntieh bad ki jri ban siat pyntieng ia ki Khasi Pnar kiba leit rep leit riang ha ka jaka rep kaba la tip kum ka Tahpat.