Mih saka ki paid NASCD ban pyrshah iaki Coke Factory

Syllad | The Rising MeghalayaSeptember 7, 2021

Ka jingpyrshah iaki Coke Factory ne ki karkhana saiñ rnga dewiong kiba la kynnoh bala shna beaiñ kala nang sawa jam hadien ba ka Nongkhlieh Area Socio and Cultural Development (NASCD) kala mih shakhmat ban pyrshah iaka jingshna ia kine ki karkhana hapoh ka elaka Nongkhlieh, East Jaintia Hills District.

Ka Nongkhlieh Area Socio and Cultural Development hapoh ka jingialam u Embok Pajuh chairman bad u Embhah Sukhlain secretary haka sngi ba Ar kila leit ban ai da ka dorkhat ha u CEM ka Jaiñtia Hills Autonomous District Council (JHADC). La ai ruh iaka dorkhat sha u Chief Forest Officer ka Jaiñtia Hills Autonomous District Council (JHADC) ban ujor pyrshah iaka jingai NOC sha ki Coke Factory ne ki karkhana saiñ rnga dewiong  hapoh ka Elaka Nongkhlieh khlem ka tip lang ki para marjan shnong.Ka Nongkhlieh Area Socio and Cultural Development kala pyrshah jur iaka jingai NOC ban shna ia kine ki karkhana tang da ka jingmynjur u Dolloi ka Elaka Nongkhlieh bad ki waheh shnong, khlem ka jingtip u paidbah nongshong shnong kiba shah ktah bad ki shnong ba marjan.

“Ka jingdon jong kine ki karkhana coke kam ktah tang ïa kawei ka shnong hynrei ka ktah ïa kiwei ruh ki para marjan shnong naka tdem jaboh kaba pynmih na kine ki karkhana kaba la ktah shikatdei eh iakakoit ka khiah u nongshong shnong bad iaki jingthung jingtep,” la ong ki nongialam ka Nongkhlieh Area Socio and Cultural Development bad bynrap ba ka jingshna iaki karkhana coke hapoh katei ka elaka kala ktah iaka Tongseng, Shnongrim, Khaidong, Shnong Thymme, Shnong Lumbangla bad kiwei de ki shnong ba don marjan.