Mih shakhmat ki bor District ban leit ai injek anti rabies ia ki ksew ha ka nongbah Shillong 

Syllad | The Rising MeghalayaMarch 20, 2024

Ki bor District ka East Khasi Hills ki la mih shakhmat ban pynlong ka jingleit ai injek anti-rabies ia ki ksew ha kylleng ka Nongbah Shillong, ban iakhun ban pynduhjait ia ka jingpang rabies hapoh ka District.

Kane ka jingleit ai injek kaba hynriew sngi kynthih ka la sdang naduh ka 11 tarik Lber 2024, lyngba ka District Joint Steering Committee on Rabies Elimination ka East Khasi Hills kaba kynthup ia ki bor pyniaid district, ka Tnat ka koit ka khiah, ka Tnaat Veterinary, Shillong Municipal Board, ka Seng treimon sngewbha HUFAN ha ryngkat ki Dorbar Shnong.

Nalor kata kane ka jingleit ai injek anti rabies ka kynthup naduh ki skew ba ri da ki briew bad ki ksew surok kumjuh ha kaba ha kine ki hynriew sngi kiba la dep la lah ban ai injek ia haduh 631 tylli ki ksew, kata kiba ri haiing bad ki ksew surok ha kylleng ki shnong jong ka nongbah Shillong.

Na ka liang ki Tnat ka koit ka khiah ka la pynpaw ba ka jingdait, ka jingtrud ne jliah ia ki dak mong ha ka sniehdoh da ki ksew kiba don ia ka jingpang rabies ka lah ban wanrah ka jingpang rabies ha ki briew bad kaba ktah ia ka jabieng bad u budlum bad kaba buh ruh ha ka jingma kaba lah ban lam sha ka jingiap.

Nalor kata ki bor District ki pyntip ba ka jingdon jong ki briew kiba shah dait ksew ha Jylla kala kiew bha hapdeng kine ki shi snem bala leit noh, kata kaba la kiew na ka 5302 ngut ha u 2022 sha ka 9611 ngut ha u 2023.

Ka East Khasi Hills  ka dei kaba don bun eh ki jingjia shah dait ksew, kata kaba long haduh 50% ki case. Ha u snem 2022 ki la don haduh 2512 ngut kiba  shah dait ksew bad ha u 2023 kala kiew sha ka 5085 ngut. La ong ba haduh 80% na kine ki jingdait ksew ki dei kiba jia ha jaka sor.

Shuh shuh la ong ba ka jingpang rabies watla ka dei 100% kaba don jingma hynrei ka dei pat kaba lah ban iada 100% bad ki lad jingiada kiba dei ban shim ka long ban sait wut wut ia ki jaka ba shah dait da ka sabon hapoh ka um ba tuid kumba 15 minit eiei bad sa leit wad ia ki jingsumar ha ki jaka sumar ba marjan ba kin ai ia ki dawai injek.

Shuh shuh ki bor ka tnat ka koit ka khiah ki la ong ruh ba ia ki ksew ba suba don jingpang rabies ym dei satia ban pyniap hynrei ban shu kiar bad ban peit thuh haduh 10 sngi bad ban pyntip sha ki bor ba dei khmih.