Mih shibun ki jingai jingmut haka jingiakren halor ka Draft Meghalaya Youth Policy 2021

Syllad | The Rising MeghalayaMarch 25, 2021

Ka ophis u Deputy Commissioner, West Jaiñtia Hills District ryngkat bad ka ophis u District Sports Officer, West Jaiñtia Hills District ka la pynlong ïa ka “Worksop Cum Consultation Programme halor ka Draft Meghalaya Youth Policy 2021” ha Ïungwalieh (Community Hall) jong ka Dorbar Shnong Tpep-Pale, Jowai haka sngi Palei. La wan shimbynta ha kane ka workshop da ki samla shynrang bad kynthei, ki nongmihkhmat jong ki seng nongïalehkai bapher bapher, ki khynnah skul bad kiwei de.

Ha ka jingkren lamphang, u Deputy Commissioner ka district u Garod LSN Dykes u la kdew kyrpang ïa ka mat kaba ïadei bad ka “Early Intervention” kaba mut ban rap ïa ki khynnah naduh ba ki dang don san snem khnang ba ka lawei jong ki kan long kaba bha kaba miat.

U la ban ruh ba ki samla ki dei ban ïoh ïa ki jinghikai shaphang ka akor ka burom bad ka hok ka sot (Moral and Ethical values). U la ong ba ïa ka jaitbynriew jong ngi la tip kum ka jaitbynriew kaba tip-briew tip-blei, tip-kur tip-kha bad kaba imsngi ban kamai ïa ka hok bad kumta ngi dei ban ïai pynim ïa kane ka jinglong ha ki samla jong ngi.

La pynïaid ïa kane ka workshop da i Kong R. Lyndem iba long i PTI hapoh ka Sports Department bad i la pule ruh ïa ki mat jong kane ka Draft Meghalaya Youth Policy 2021 khnang ba ki nongshim bynta ki lah ban ïatai bad ai jingmut.

U Ma Khroobok Passah uba long u DSO ka West Jaiñtia Hills District, u la ong “Dei ban don sa kawei ka “Thrust Area” ha kane ka policy bad kata ka dei ka kam jngoh-kai pyrthei (Tourism) kaba lah ban ai kam ai jam ïa ki samla jong ka jylla”. U Ma Passah u la ai jingmut ruh ba ki district ka jylla ki dei ban don la ki jong ki “School of Creative and Performing Arts” ha kaba ki samla ki lah ban ïoh ïa ki jinghakai bad ka jingpyntbit ha ki kam rwai, shad, ka put ka tem, ka ak drama bad phlim, ban thoh dur, ki kam thaiñ jingthaiñ bad kiwei kiwei de ki jinghikai ha ka liang ka Creative and Performing Arts.

U Hame Shaniah Suïam na ka seng ka Kickboxing u la kyntu ba ka Youth Policy ka dei ban peit bniah ïa ka koit ka khiah ki samla ha ka liang ka jingmut jingpyrkhat jong ki (Mental Health) khang ba kin lait na ka jingshimnoh lade ïa ka jingim jong ki bad u la kyntu ruh ba man la ki CHC bad ki PHC ki dei ban don la ki counselling centre na ka bynta ki samla. U la ong ruh ba ka jylla ka dei ban ïarap ïa ki skul ha ka liang ka kam ïalehkai khnang ba kin lah ban shim bynta ha ki jingïakop jong ka School Games Federation of India.

U Ma Soolangki Laloo, uwei na ki nongshong shnong u la ai jingmut ban kyntiew ruh ïa ki jingïalehkai tynrai (Indigenous games) jong ka Ri Jaiñtia lyngba ka Sports Department bad ban pynlong ïa ki jingïakop halor jong ki.

U Ma DR Michael Buam, u General Secretary ka West Jaiñtia Boxing Association (WJBA) u la ai jingmut ba ka Youth Policy ka dei ban kyntiew ïa kiwei ruh ki jait jingïalehkai hapoh ka jylla khnang ba ki sap jong ki samla ha kiba bun jait ki jingïalehkai kin paw pyrthei. Khnang ban pynkiew bad pynshlur ïa ki samla ha ki jingïalehkai bapher bapher, u la kyntu ba ki skul ki dei ban don ki nonghikai kiban hikai shaphang ki jingïalehkai bapher bapher (Games Teacher). U la ai jingmut ruh ba ka Youth Policy ka dei ban pynshlur ïa ki samla ha ka kam rep kam riang bad ka kam ri jingri da kaba buh ïa ka “Farming and Allied Activities” kum sa kawei na ki “Thrust Area” jong ka Youth Policy namarba ka kam rep kam riang ka ïarap ha kaban pynbiang ïa ki marbam na ka bynta ka jylla bad ka ai kam rum ïa ki samla.

Ha ka liang ka sports infrastructure hapoh ka jylla, u Ma Patrick Lamare u dkhot jong ka West Jaiñtia District Sports Association (WJDSA) u la ong ba ka sorkar kam dei ban kyntiew tang ïa ki department lajong hynrei ka dei ban kner la ka kti ban kyrshan ïa ki seng jingïalehkai bapher bapher ha kaban pynbiang ïa ki jaka bad ki tiar ba donkam ha kaban kyntiew ïa kano kano ka jait jingïalehkai. U Ma Ferdinand Suchiang, u nongialehkai martial arts ba pawnam na Ri Jaiñtia, u kwah ba ka Youth Policy kan kynthup lang ïa ki “Contact Sports” (kum ka Boxing, Kickboxing, Karate, etc.) ha ki skul namarba ka juk mynta ka dawa ïa ka khamtam na ka bynta ki samla kynthei ban ïada ïalade na ki briew ba leh thombor.

Ka Meghalaya Youth Policy ka la buh ïa ka thong ba ka jylla kan kot sha ka kyrdan kaba hap ha ki Top-Ten hapdeng ki jylla jong ka ri hapoh u snem 2030. Ka la buh ruh ïa jingangnud ban pyndep ïa ki thong jong ka Sustainable Development Goals (SDG) kiba la buh da ka United Nations (UN). Ïa ka Draft Meghalaya Youth Policy lah ban download na ka website www.meghalayayouth.com bad ka sorkar ka wer ïa ki paidbah ka jylla ban phah ïa ki jingai jingmut jong ki hapoh ka 30 tarik une u bnai da kaba phah ïa ki lyngka ka e-mail sha kane email address: [email protected].