Mih syndet ka JSM sha surok ban dawa kolej sorkar sa ha East Jaintia Hills

Syllad | The Rising MeghalayaSeptember 30, 2022

Ka Jaintia Students’ Movement (JSM) haka sngi Thohdieng mar sien ïoh jingtip ïaka jingwan īuhkjat jong u Myntri ka tnat pule puthi u Ma Lahkmen Rymbui sha Kiang Nangbah Government College, Jowai kila mih syndet syndet sha surok pynlong ka jingrah placard hakhmat khyrdop ban rung sha kolej.

Kane ka jingmih ki katto katne ki nongialam bad ka dkhot ka JSM sha surok ka long na ka bynta ban pynkynmaw iaka sorkar halor ka jingdonkam ban buh iaka kolej sorkar bad ka higher secondary school ha East Jaintia Hills District.

Haba īakren bad u nongïalam jong ka JSM Eastern Region u Wellson Siangshai ula īathuh ba la naduh u 2015 ka Jaintia Students Movement (JSM) ka la ud la nam ïaka sorkar Jylla ban buh noh da ka Government College ha Khliehriat na bynta ki samla pule jong ka thaiñ East Jaintia Hills District, hynrei haduh mynta mynne ka sorkar kala shu leh kuman halor kane ka jingdawa.

“Kumta mar sien ïoh jingtip ïaka jingwan ïuh kjat u Myntri ngi pynlong ka jingrah placard ban dawa ban buh kolej sorkar bad haka kyrdan secondary ha East Jaintia Hills District khnang ban lait duh klass ki khynnah”, la ong une u nongïalam.

Utei u nongïalam haka juh ka por ula dawa na ka sorkar ban pyllait thikna iaka scholarship jong ki khynnah pule haka por kaba biang khnang ba kin myntoi.