Mudui ejahar ka shnong Lakroh ia ki nongialam ka HANM bad EJNC kiba shah kynnoh ruh ban lute kwai T.4.80 lak
Ka Dorbar Shnong jong ka Lakroh, Elaka Satpator kaba hap ha Amlarem Sub division, West Jaintia Hills kala mudui da ka jingujor ejahar pyrshah iaki ar ngut ki nongialam sengbhalang ba kynthup ia u Sambormi Lyngdoh nongialam ka EJNC bad u Ency Shadap u nongialam ka HANM East Jaintia Hills halor ka jingkynnoh ba ki wan rung jubor shapoh shnong bad kren khlem akor iaki nongialam shnong bad VDP shnong.
Kumban shu pynkynmaw ba kine ki ar ngut kila shah mudui ejahar ruh halor ka jingshah lute kwai ki ar tylli ki bolero pick up kaba la kot T.4.80 lak haka 19 tarik une u bnai.
![](https://www.syllad.com/wp-content/uploads/2024/09/JIT-Vacancy-823x1024.avif)
U George Ros Mingson Manner u nongkhaii kwai ba na ka shnong Tarangblang kaba hap hapoh ka Elaka Satpator ula dep mudui ruh da ka jingujor ejahar pyrshah ia u Sambormi Lyngdoh, u Ency Shadap, u Monarch Dkhar bad u Mihsalan Thoo ryngkat 12 ngut kiwei pat bym lah ban ithuh haka 19 tarik ha Ladrymbai Outpost, East Jaintia Hills bad ula kynnoh ba kine ki nongialam sengbhalang kila lute ia u kwai haduh 60 byrni napoh kali u kiba thmu ban pynkit sha Umkiang ha ka jaka kaba la tip kum ka Rymbai Sohpieng.
U George ula kynnoh ba kine ki nongialam sengbhalang ha ryngkat bad ka kynhun jong ki kiba ym lah ithuh kiba wan da kali rit 4-5 tylli bad kawei ka Bolero (ML-11-1876) kila pakhang lynti iaki kali kit kwai jong u (ki Bolero pick-up (ML-11-4038 bad ML-05U-5059) haka por ba ki thmu ban leit sha Umkiang bad kila byrngem byrsit iaki nongniah kali jong u bad hadien kila rong tuh bad lute 60 byrni u kwai ba shongdor T.4.80 lak.
Katba ka Dorbar Shnong Lakroh ha u kyrwoh bala phah u Waheh Shnong Willy Pohplet bad u Secretary Shnong Sibil Tariang kila kynnoh ba u Ency Shadap bad u Sambormi Lyngdoh bad u Sanjay Syndai, u Ferby Syndai bad ka kynhun jong ki na Muktapur bad kiwei kiwei kiba kam ialade ba kidei na ka kynhun Sengbhalang haka 5 tarik une u bnai haka por 9 Pm kila wan rung jubor sha poh shnong Lakroh bad kila tim sih tim sang iaki nongialam shnong.
“Ki da wanrah artad bad ki tiar pynmynsaw, ynda haba ki VDP ki la pyrshang ban iakren ne ban khanglad ia ki, ki la shoh la dat bad tar ia ki ID jong ki VDP Shnong bad ki la byrngem byrsit ia ki nongialam shnong kynthup ia ki nongialam shnong,” la ong u secretary shnong Sibil Tariang
“Ki la tim sih tim sang hapoh shnong jong ngi khlem kano kano ka daw. Na ka liang ka Dorbar Shnong ka pynrem jur ia kane bad ngi la buh ruh da ka FIR pyrshah ia kine ki riew runar ha u Officer Incharge jong ka Muktapur Patroling Post,” ong shuh shuh u secretary shnong.
Ka Dorbar Shnong ka kyntu ia ki bor jong ka aiñ ba kin bishar bniah bad ban kem syndon ia kum kine ki jait briew kiba thmu wat ban shim ruh ia ka jingim ki nongialam shnong namar lada kumne shi kumne ka iai jia kan buh jingma ia ka shnong ka thaw bad ka burom ka iktiar jong ki nongialam bad ki nongtrei kam shnong.
Ka khubor pulit kaba ïohlum na East Jaintia Hills ka iathuh kine ki nongialam sengbhalang kiba shah kynnoh donkti ban lute kwai kila phet rieh na ka bor jong ka aiñ. Ki pulit ki dang pynlong ka jingthwet iaki.
Kyrmen ba ka aiñ kan trei beit khlem jingnoh shiliang ban pynshitom ia kiba leh kam runar