Mudui ejahar u Professor NEHU ia u president ka NEHUSU bad 5 ngut kiba thombor ia u

Syllad | The Rising MeghalayaApril 25, 2025

U Assistant Professor ka Hindi Dept jong ka skulbah North Eastern Hill University (NEHU) u Dr Alok Singh u la mudui da ka ejahar pyrshah ia u President ka NEHUSU u Sandy Sohtun bad 5 ngut kiwei pat halor ka jingkynnoh donkti ban thombor ia u ha ka janmiet jong ka 24 tarik Iaiong hapoh ka ophis treikam jong u haduh ba un da mynsaw.

Ha kane ka ejahar ba la mudui hapoh Mawlai Mawkynroh Police Outpost, u Dr Alok Singh u pyntip ba ha ka 24 tarik Iaiong ha ka por kumba 4.45 janmiet, u president ka NEHUSU lem bad sangut ki paralok jong u ki la khang kut jubor ia u hapoh ka kamra jong ka Dept. U la iathuh ba kine ki san ngut ki la ktahkti bad thombor ia u da kaba byrthen ruh ban pyniap da kaba pynap da ka kanshi na u ryndang.

U la iathuh ruh ba ha kane ka jingshah thombor u la ngat ha ka jingmynsaw na ki bynta jong ka khlieh, ki kjat bad kti.

“Nga da sngewsih kthang halor kane ka jingjia bad nga dang don hapdeng ka jingsyier. Kum u nonghikai mynta ngam don shuh ha ka jingshngain bad don ha ka jingma hapoh ka campus,” u la ong ha ka ejahar da kaba kyntu ban shim mardor ia ki sienjam kiba donkam katkum ka ain bad ban pynthikna na ka bynta ka jingshngain jong u bad pynneh ia ka burom jong ka skulbah.

Haba kren sha ki lad pathai khubor haka 25 tarik Iaiong, u Dr Alok u la batai halor katei ka jingjia kumno ba kitei ki sanngut ki la thombor ia u da kaba kynnoh ba ula leh politik, kata watla na ka liang jong u, ula ong ba um shym la leh ia kano kano kaba bakla.

Haba pynrem ia kane ka jingjia na ka liang ki nonghikai jong kane ka skulbah ki la pynlong da ka jingiakhih kaba jai jai hakhmat ka ophis jong u Vice Chancellor, da kaba kyntu ban ioh ia ka jingpynthikna na ki bor pyniaid bad dawa ruh ban shim ia ki sienjam ban pynthikna na ka bynta ka jingshngain hapdeng ki nonghikai.   

“Ngi kum ki dkhot jong ki nonghikai ka NEHU ngi ieng ryngkat bad u Dr Alok Singh bad ngi kwah ban pynpaw ia ka jingiatylli ka jong ngi bad u bad ba ngin ym sheptieng la ha kano kano ka rukom ia kum kine ki riew bymman kiba kwah ban pynjah burom ia ka skulbah da kaba pynkhein ia ki kyndon ain,” ong ki nonghikai.

“Ngi la tip bad ngi la sakhi ia ki kam bad ki rukom treikam jong kiba kum kine ki kynhun runar ha kine ki khyndiat bnai kiba la dep bad kiba la kam ba ki dei ki nongkitkam jong ka NEHUSU.Ngi pynrem jur ia kane ka kam khawpud ban leh ia kane ka kam thombor.”

Ki la ong ruh ba kane ka kam pyntriem kaba dei ka jingpyrshang ban shim ia ka jingim jong u dkhot ki nonghikai ha la ka jong ka ophis dei ia ka ban pynrem jur da kaba tyngeh. Kam dei tang ka kam thombor ia uwei u briew shimet, hynrei ia ka burom ka jingshngain bad ka jinglong kyntang jong ki nonghikai baroh.

Nalor kata ki nonghikai ka NEHU ki la dawa ruh na ki bor pyniaid jong ka Skulbah, ka Sorkar Pdeng bad ki Tnad jong ka ain ba kin shim ia ki lad jingpynshitom pyrshah ia kine ki riew runar khlem da pynslem bad ba ba kine ki riew bymman ki dei ban shah set phatok na ka bynta ban pynioh ia ka hok.