Mudui ka KSU da ka FIR ha ki Pulit ba kylla rong bad iap dohkha ha Wah Lukha

Syllad | The Rising MeghalayaApril 29, 2020

Ka Khasi Students’ Union (KSU ) Narpuh Circle kala mudui da ka jingujor ejahar (FIR) ha Lumshnong Police Station pyrshah ia ka jingpynjaboh bad ka jingkylla rong ka wah Lukha kaba la wanrah iaka jingiap biang ki dohkha ha shilynter ka wah.

Ka KSU kala mudui ia kane ka ejahar haka 28 tarik bad kynnoh ba ki jakhlia ha katei ka wah naduh 23 tarik une u bnai kila tuid khlem sangeh ha katei ka wah.

Ka KSU kala ban jur iaki pulit ban tohkit halor kane ka jingjia ba ban wad iaka tyllong kane ka jakhlia namar naduh bala pynjari iaka lockdown kane ka wah kala khuid ban wanphai biang ki dur barim jong bad ki dohum dohpnat kila sdang khie im biang.

Pynban  ha kane ka 23 tarik la wan ki jakhlia kiba suba jur ki phngit dewbilat kila tuid sha ka wah ban wanrah iaka jingiap biang ki dohkha bad kylla rong ka wah.

Ia kane ka jingujor la leit ban ai da u KS Suchiang President Narpuh Circle ha ka jingiadonlang u u Phanuel Tongper Vice President, Sanatomba Bamon General Secretary ha ryngkat ka jingsynran lang ki dkhot.

Lah ban pynkynmaw ba ka jingkylla rongblue ka wah lukha bad ka jingiap ki dohkha ha katei ka wah ka la jia nyngkong ha u snem 2007 bnai Rymphang (February) bad naduh katei ka por ka jingkylla rong katei ka wah bad ka jingiap dohkha ka dangiai bteng haduh mynta.

Ia katei ka jingujor la leit ai kopi ruh sha u Deputy Commissioner EJH bad sha u Superintendent of Police EJH.