Mudui u Dy Speaker da ka mukotduma ia ki nongai khubor bakla; 200 klur dawa bai mynrain khmat

Syllad | The Rising MeghalayaMarch 13, 2025

U Deputy Speaker ka Iingdorbar Thaw Ain ka Jylla u Timothy D Shira ha ka 12 tarik Lber u la mudui da ka mukotduma mynrain khmat pyrshah ia ki arngut ki briew kiba la kynnoh ia u ba u long pyrshah ia ka jingdawa ban thaw ia ka Nongbah Tlang ne ka Winter Capital ha Tura, West Garo Hills District lyngba ki rynsan social media.

Ia kane ka mukotduma mynrain khmat la ujor pyrshah ia ka Mikkanchi R Sangma kaba na Darangiri, Goalpara District, Assam bad u Balsrang Marak na Thapa Darenchi, North Garo Hills hapoh ka kashari jong u Chief Judicial Magistrate, Shillong.

Katkum kane ka mukotduma u Deputy Speaker u la dawa na kine ki arngut ba ki dei ban siew ia ka bai mynrian khmat kaba haduh mar T.100 klur, kata kaba long baroh T.200 klur.

Haba kren sha ki lad pathai khubor, u Timothy u la ong, “Nga la mudui da ka mukotduma mynrain khmat pyrshah ia kine ki arngut ki briew namar ki la pynphriang lyngba ka Youtube ha kaba iadei bad ka jingkren jong nga hapoh ka Iingdorbar ha kaba iadei bad ka jingpynkha ia ka Tura kum ka Nongbah Tlang.”

“Khlem da tip bniah ia kaei kaba nga la kren hapoh ka Iingdorbar, kine ki briew ki la pynmih ha ka You Tube ba nga long pyrshah ia ka jaidbynriew, nga long pyrshah ban pynlong ia ka Tura ka Nongbah Tlang ha kaba u la ong ba u pynrem jur ia nga namar ka jingbym iatreilang bad ka jaidbynriew,” u la bynrap.