Mudui u Mukul Sangma ba pynphriang ia ka video thok ban pynthohbria ia u

Syllad | The Rising MeghalayaNovember 13, 2024

U nongialam ka liang pyrshah ka Trinamool Congress (TMC) u Dr Mukul Sangma ha ka 12 tarik u Naiwieng u la mudui pyrshah ia uwei u briew halor ka jingpynphriang ia ka video kaba lamler bad kaba shu shna thok da ka jingthmu sniew ban pynthohbria bad pynjah burom ia u.

Ha ka shithi sha u Returning Officer, une u Myntri Rangbah barim ka Jylla u la ong, “Ia ka video kaba la pynphriang lyngba ki rynsan social media la phah sha nga da ki paralok na ka party jong nga.”

“Ha kane ka video uwei u briew uba ngam shym la ithuh da lade hi shimet hynrei uba la pynithuh ia lade kum u Fourthligh Ch Marak kumba ka paw ha ka Facebook page jong u Andresh Chambuong Marak, u la kynnoh ia nga ba nga la ktahkti bad thombor ia u ha ka por mynstep,” ong u Mukul.

U Mukul u la ong, “Ka jingkynnoh ha katei ka jingthoh ka long kaba bakla shibun, ka dei kaba la shna thok bad kaba la ktah ruh ia ki jingmut jingpyrkhat jong nga. Kane ka jingthoh kaba lamler ka la ktah jur ruh ia ka nam ba bha jong nga bad ka lah ruh ban ktah jur ha kaba iadei bad ka jingmih na ka elekshon shiteng samoi ha Gambegre kaba dang iaid mynta bad ka ban nangpynsniew dur shuh shuh ia ka nam ba bha kaba nga la tei ha kine ki snem kiba la leit noh da ka jingtrei shitom, ka jingkhuid bad ka jinglong ba janai.”

Nalor kata u Mukul u la dawa ba dei ban pynlong mardor ia ka jingtohkit halor kane ka kam katkum ka ain.

“Ia kane ka kam dei ban tohkit mardor katkum ka ain bad ia ka jingmih na ka jingtohkit dei ban pynpaw paidbah mardor khnang ban iada na ka jingpynjah burom kaba yn ym lah ban pynbha pat bad ruh ban shim ia ki lad jingpynshitom katkum ka ain,” u la ong ha ka shithi.