Mynjur ka DoNER ia ka mang tyngka ban kyntiew kyrdan ia ka Mawlai Sub-Station: Mondal

Syllad | The Rising MeghalayaMarch 11, 2025

U Myntri ka Tnad Bording u Abu Taher Mondal haka 10 tarik Lber u la pyntip ba ia ka mang tyngka bathymmai ban kyntiew kyrdan ia ka Mawlai Sub-Station na ka 3×20 MVA sha ka 3×50 MVA la aijingmynjur da ka Ministry of DoNER ha ka 16 tarik u Kyllalyngkot 2025.

U Myntri u la ong ba kane ka project kaba la tyrwa ban pyntrei hapoh jong ka NESIDS-OTRI Scheme bad ia kaba la mang T.49.8 klur ha kaba nyngkong mynta la kyntiew ia ka jingmang kaba thymmai kaba kot sha ka T.79.23 klur ia kaba la mynjur da ka DoNER.

Haba jubab hapoh ka iingdorbar ha ka kynta buh jingkylli, u Mondal u la ong, “Namar ka jingkiew dor jong ka project, ka bhah jong ka Sorkar Pdeng ka la kut ha ka jingmang pisa kaba la mynjur ha kaba nyngkong kaba long T.49.8 klur bad ia ka jinglut jingsep kaba sah kaba long T.29.43 klur la hap ban bei da ka sorkar Jylla.”

U la pyntip ruh ba ia kane ka project yn pyntreikam da ka Meghalaya Power Transmission Corporation Limited (MePTCL).

Halor ka jingkylli ba la wanrah da u MLA ka Mawlai u Bah Brightstarwell Marbaniang, u Mondal u la kular da kaba ong, “Ngin pyrshang katba lah ban iohi ba yn lah ban pyndep kham kloi ia kane ka project namar kane ka Sub Station ka dei kaba kongsan bha ia ka Nongbah Shillong.”