Mynjur ka dorbar lyuir JHADC ïaka aiñ jied Dolloi

Syllad | The Rising MeghalayaAugust 1, 2019

JOWAI: Ka Dorbar Lyuir jong ka Jaiñtia Hills Autonomous District Council (JHADC) da kawei ka sur kala mynjur ïaka aiñ ‘The Jaiñtia Hills Autonomous District (Election to the office of Dolloi) Rules 2019’ kaba don ka jingpynkylla ha kaba ïadei bad ka phorm thep kyrteng (nomination paper) jong ki kyrtong ba ïakhun elekshon Dolloi haka sngi Palei.

Kane ka dorbar ka dei ban kut haka 30 tarik u Naitung, hynrei hadien ka jingkhlad noh u Dr. Donkupar Roy, u Lamphang ka ïing dorbar thawaiñ ka jylla, ka JHADC kala pynjlan noh ïaka sngi shong dorbar.

Ïa kane ka bill la wanrah da u Ma Finely Bareh, EM Political haka 25 tarik u Naitung, ka sngi sdang jong ka dorbar lyuir jong ka konsil.

Ka JHADC kala wanrah ïa kane ka aiñ hadien ka jingbthah jong ka ïingbishar ba don burom, ka Meghalaya High Court ban pynkylla ïaki kyndon haka phorm thep kyrteng haba pynlong ïaka election Dolloi bad dei ruh ban pynpaw haka phorm thep kyrteng jong ki kyrtong ïaki kam runar ruser lada don bad kiwei kiwei ki kam kiba u kyrtong u trei u ktah khnang ba u paidbah haba jied dolloi kin ioh jingtip kaba shai bad ban wanrah ka jingkhuid jingsuba haba jied dolloi ha kano kano ka elaka.

Ki MDC jong ka konsil kila pynlong ruh ka jingsngap kaba jar jar ban sngewlem ïaka jingkhlad u MDC barim jong ka JHADC u Ma Willy Bertus Suchiang, uba la khlad haka 31 tarik u Naitung 2019.

U Chairman jong ka JHADC u ma Lakhon Biam ula pynwai noh ïa kane ka dorbar bym don shuh kiwei pat ki mat ne ki kam ban ïatai bad ïakren..