Mynjur ka JAC ban iakynduh ia u VC ka NEHU, bteng ka jingiakhih

Syllad | The Rising MeghalayaNovember 15, 2023

Ka  Joint Action Committee (JAC) ka NEHUTA, NEHUNSA bad NEHUSU ki la mynjur ban iakynduh ia u Vice Chancellor jong ka skulbah North Eastern Hill University (NEHU), u Prof PS Shukla lashai ka sngi Palei 16 tarik Naiwieng na ka bynta ban pynlong ka jingiakren halor ki khyndai tylli ki mat jingdawa jong ka, ong u Chairman ka JAC u Prof Lakhon Kma hynne ka sngi Balang.

Kane ka jingiakhih ba khlem buh por ka JAC kaba la bteng sha ka sngi kaba lai ka la pynthut jur ha kaba iadei bad ki jingtreikam jong kane ka skulbah bad ha ka liang ka pule puthi jong ki samla pule.

“Kan don ruh ka general assembly jong ka JAC shabar ka ophis u VC hadien ka jingialang ban pynpaw halor ka jingmih na ka jingialang bad ki dkhot bad ruh ban shim ia ki rai ki ban dang iaid shakhmat, ong u Chairman ka JAC.

Ha kajuh ka por u Prof Kma u pynbna ruh ba kane ka jingiakhih kan dang bteng lashai ka sngi Palei tad haduh ban da shim da kiwei pat ki rai.

Kum ban shu kdew ba ka JAC ka la pynlong ia ka jingiakhih kaba la sdang naduh 13 tarik mynta u bnai ban pynpaw ka  jingpyrshah ha kaba iadei bad ka jingleh mynthi jong u VC ka NEHU ban weng kam ia u Rohit Prasad nalor kiba bun kiwei pat ki jingdawa.