Mynjur ka JHADC iaka bill Village and Town Development Council | Ïano ka pynkup bor bad kiei ki dkhot

Syllad | The Rising MeghalayaJune 20, 2023

Ka dorbar kyrpang jong ka Jaintia Hills Autonomous District Council (JHADC) kala mynjur iaka Jaintia Hills Autonomous District Council (Village and Town Development Council) Bill 2023 haka sngi ba Ar.

Kane ka bill ka dei naka bynta ban wanrah iaki pynroi sha shnong ki thaw ha ki jaka sor bad nyngkyndong lyngba ka skim sorkar pdeng.

U Chief Executive Member JHADC ma Thombor Shiwat ula ong ba kadaw bala wanrah ia kane ka aiñ kadei hadien bala bthah daka sorkar jylla baki district konsil ki dei ban pynkhreh iaka aiñ village council, namar ba ym shym la pynkup bor iaki, kumta ban pyntreikam iaka iaka village council baroh ki district council ki dei ban thaw iaki aiñ ba kin don ka bor kaba kyrpang ha ki village council.

Ula ong ruh ba imat ka sorkar pdeng ha kane ka dorbar lyuir ha Parliament kan ai noh iaka jingmynjur ban pynkylla thymmai iaka Sixth Schedule ban pynnkhlain bor ïaki konsil.

“Kane ka bill kadei kaba donkam ban tehsong iaki shnong ki thaw lyngba ka Village and Town Development Council ki ban trei katkum ka ain bad ki kyndon ban wanrah iaki roi ka par bad kino kino ki jingtrei ki dei ban iaid lyngba ka konsil,” la ong u CEM ma Thombor bad bynrap kane ka bill ka dei naka bynta ka jingmyntoi ki shnong hapoh u pud u ang ka konsil bad kino kino ki jingai jingmut ki tynsad lang bad ngin shim iaki jingai jingmut jong baroh ki para dkhot khnang ba ngin ioh phah noh mar mar sha ka sorkar ban ioh iaka jingmynur u Lat.

Katkum ka Bill; ki dkhot jong ka ki dei ki dkhot shnong ba pura, ki dei ruh ban long ki nongshong shong ba pura ka Jylla bad ki dei na ka jaidbynriew Pnar, Khasi, War, Bhoi, Biate bad Hmar (native of Khaddum nad Sialkan Village).

Ki Village and Town Development Council ki dei kiba ithuh da ka konsil kaba la thaw da ka dorbar shnong. Ki dkhot jong ka ki dei kim dei ban duna iaka 10 ngut kynthup lai ngut ki kynthei. Ka dei ban don ia u Chairman, Vice Chairman, Secretary, Assistant Secretary bad Treasurer. U Waheh Shong u dei u Chairman jong kano kano ka Village and Town Development Council.

Ki dkhot ki dei kiba la kynjoh iaka rta kaba 25 snem shaneng uba dei u trai shnong ba pura bad udei ban long u trai ri bad u/ka ym dei ban long kiba la shah rai pynrem palat iaka 6 bnai.

Ka por treikam kane ka council ka long kam dei ban duna iaka 1 snem lane 3 snem.

Ki dkhot kim dei ban long kiba trei hapoh District Council, MLA, MP, MDC lane ki nongtrei hapoh ki tnad sorkar.

Ka jingtreikam kane ka council kan long beit thik iaki kam pynroi shnong, kata ban shna iaki surok bad ban maramot, ki jaka pynlang um, nala, ban pynpoi um sha ki jaka rep bad kiwei kiwei ki kam pynroi.

Kane ka aiñ ka pynkupbor iaki bor shnong ban don iaka Local Area Development Planning Council bad hapoh kane yn kynthup iaki MDC ban long ki dkhot bad uno un u officer ka konsil un long kum u/ka secretary.

Katba haka District Development Planning Council, ka Executive Committee jong ka konsil ka don ka bynta kaba khraw ha kaban iatai bad wanrah iaki kam pynroi bad u Secretary District Development Planning Council u/ka secretary JHADC.

Shuh shuh ki Village and Town Development Council kin hap ban buh ryntih iaka jingkhein jingdiah, ka don ruh ka social audit bad lah ruh ban pan RTI nalor kiwei kiwei ki lad jingujor lada phiel treikam ki village and town development council.

Ha kane ka ain ki don dollloi/sirdir kim don kano kano ka bynta eiei bad la pynkup bor pura iaki bor shnong.