Mynjur ka JHADC iaka mang tyngka 2021-22, thalain u ma Thombor ia ki MDC BJP

Syllad | The Rising MeghalayaMarch 26, 2021

Ka Jaintia Hills Autonomous District Council (JHADC) kala mynjur iaka mang tyngka kaba duna T.13.15 klur na ka bynta u snem 2021-22 bad ia kane ka mang tyngka la mynjur khlem da wanrah iaka cut motion lane ka jingiatai haka sngi Thohdieng.

Ia kane ka mang tyngka la mynjur haka sien shong kaba ar haka por nohphaisngi, kaba ki MDC ka liang pyrshah hadien ba ym hun satia iaka jingpynduna sngi iaka rukom shong dorbar kila weng lut ia baroh ki cut motion.

U Chief Executive Member (CEM) jong ka Jaintia Hills Autonomous District Council (JHADC) u ma Thombor Shiwat ula wanrah iaka Mang Tyngka jong u snem 2021-22 kaba duna haduh T.13.15 Klur naka jingmang ban iohlum haduh T.173,50,30,000 Klur bad ka jingmang pynlut pat ka long T.186,65, 21,300 klur.

Shuwa ban mynjur ia kane ka mang tyngka kala don ka jingiakren halor ka mang tyngka kaba wanrah u ma Thombor. Ka liang pyrshah naduh u ma Lakhon Biam, u ma Krison Langstang, u ma Dawan Lyngdoh, u Ma Holando Lamin bad u ma Awhai Andrew Shullai kila shimbynta bad kila kyntu iaka executive committee kaba ialam u ma Thombor ban thaw ki lad ki lynti ba ka konsil kan ieng rasong.

U Ma Lakhon, ula kala kynthoh tyngeh iaka EC kaba ialam u ma Thombor ba kala shah knieh bun ki bor haka sorkar jylla bad ban jur iaka EC kaba ialam u ma Thombor ban ieng rangbah ban iasaid ia ka bha ka miat ka konsil khnang ban tem iaka jinglait rud ka khajna baka konsil ka dei ban ioh.

Wanrah ka JHADC iaka mang tyngka ba duna T.13.15 klur, pynksan u ma Thombor kan pynktik iaki MDC ban jop

Ula ong shuh shuh u ma Lakhon ba ka EC u ma Thombor ka khot ban iatreilang, hynrei ka jingshisha hi ka ktien bad ka kam kam iadei satia bad ki MDC ka liang pyrshah ki duh bun ki jingmyntoi ban pynpoi iaki lad jingiarap sha u paidbah.

“Ka Budget speech ka dei ka policy document ba kdew iaka mat treikam jong ka EC, pynban haba ngi peit bha iaka jingkren u CEM kane ka EC kam don ka mission ne mat treikam jong ka ban pynbha iaka konsil,” la ong u ma Andrew.

Ula ong ruh ba ka EC kala kubur baka sorkar kala shim iaka ka bor ka konsil ha kiba bun ki bynta bad ula kyntu iaka EC ban tem iaka jinglait rud ka khajna jong ka konsil naduh na u dewiong uba la lait tuh, ban pynduna iaka jingpynlut ka konsil bad ban iarap ban pynioh salonsar iaki skim MDC ban myntoi u paidbah.

U Ma Thombor Shiwat haba kren ula ong ba ka deficit budget ne ka mang tyngka kaba duna kam dei ka sien kaba nyngkong kaba la wanrah hapoh ka konsil bad ula ong ba ka konsil kala pyrshang bad kam shym la shong kli kti ban pynbiang iaki jingdonkam ka konsil ba kan iaid shakhmat.

Ula ther tyngeh ruh iaki MDC ka liang pyrshah khamtam iaki MDC ka BJP kiba la bun kam tang haka ban file RTI bad ban kynthoh sha ki khubor iaka EC.

“Kaba nga sngewsih eh ka long ba ka BJP ka ujor sha ka sorkar pdeng ban nym pyllait jingiarap shuh sha ka konsil bad ki don ki sakhi sabut bad nga,” la ong u ma Thombor.

“Lada phi wit iaka rukom treikam jong nga, lane kwah ban kynthoh ia nga kam pher bad kynthoh katba mon, hynrei haba phi kwah grant ne jingiarap balei pat phi thoh sha ka sorkar pdeng ban pynsangeh iaka jingiarap khlem da kynmaw pat iaka burom ka konsil,” la kren dumok u CEM iaki MDC ka BJP.

“Phi iakren ba iakhun ba ka konsil kan lait hap sha riat, phewse phi hi kiba die iaka burom ka ijot jong ka konsil sha bar haba phi la tip iaki jingeh jong ka konsil,” ong u ma Thombor.

Shuwa kane kala don ka kynta kylli jingkylli bad jubab.