Mynjur ka sorkar ban phah pule pyntbit ia ki heh sorkar ban pynjanai ia ki rukom treikam

Syllad | The Rising MeghalayaAugust 11, 2023

Ka sorkar Meghalaya mynta ka sngi Thohdieng ka la mynjur ia ka jingtyrwa ban ailad ia ki ophisar sorkar jong ki tnat bapher bapher ba kiba kynthup ia ka All India Services, Meghalaya Civil Service, Meghalaya Police Service, Forest , Finance Services bad kiwei kiwei ba kin bteng ia ki jingpule ha ki lain bapher bapher khnang ban kyntiew bad pynjanai shuh shuh ha kaba iadei bad ki rukom treikam.

Ia kane la pynpaw da u Myntri sorkar uba dei ruh u nongaiktien ka sorkar MDA u Bah Paul Lyngdoh haba kren sha ki lad pathai khubor hadien ka jingialang ka kynhun myntri, kata da kaba bynrap ruh ba ia ki jinglut jingsep kaba lah ban kot sha ka T.15 lak yn bei  na ka liang ka sorkar.

U la ong ruh ba ha ka jingiamir jingmut, ka sorkar ka la rai ruh ban pynlut haduh 15 lak tyngka na ka bynta ia bai tuition jong kine ki ophisar, bad ki course kiba kine ki ophisar ki lah ban leit pule ki lah ban long ha ka online ne ka offline, hynrei kin ym lah pat ban shim shuti na ki jingtreikam jong ki na ka bynta ban pyndep ia kane ka jingpule ha ki tnat pule bapher bapher.

Nalor kata u la ong ruh ba kine ki ophisar kiba ioh ia kane ka tuition fee na ka sorkar kaba kaba lah ban kot sha ka T. 15 lak ka thmu na ka bynta lai ngut ki ophisar ha ka shi snem ia kaba na ka liang ka committee jong ka sorkar ba la thung kan ai ka jingmynjur ia ka jingtyrwa bad pyntip ruh ia ki ophisar ki ban leit ban bteng ia ka jingpule kin dei tang kito ki ophisar kiba ka jingtreikam ba dang sah jong ki kan ym duna ia ka hynniew snem.

Kane ka committee ia kaba yn khlieh da u chief secretary kan bishar bniah ruh na ka bynta ban ai ka jingmynjur na ka bynta kiba kum kine ki heh ophisar.

Ha kawei pat ka bynta ka kynhun myntri ka la ai ruh ka jingmynjur ha kaba iadei bad ka jingpynkhreh ia ki jingkren ha ka sngi Independence Day kaban pynpaw halor ki jingjop bapher bapher jong ka sorkar naduh ba ka la shimti ha ka bor.