Mynjur ka Sorkar ban pynkylla ia ka Meghalaya Building Byelaws, 2021 ban shngain ki jingtei iing

Syllad | The Rising MeghalayaFebruary 9, 2024

Ka Sorkar jylla hapoh ka jingialam u Myntri Rangbah u Conrad K Sangma haka 9 tarik Rymphang  ka la mynjur ban wanrah jingkylla ha kaba iadei bad ka  Meghalaya Building Byelaws, 2021 na ka bynta ka jingshngain ha ki kam tei iing tei sem.

Haba kren sha ki lad pathai khubor, u CM u la ong; “Ngi la mynjur ha kaba iadei bad ki katto katne ki jingkylla ha ka Meghalaya Building Byelaws, 2021 bad ban pynneh pynsah ia ka jingroi ki jaka sor hapoh ka jylla.”

 “Ia kine ki jingkylla la leh da kaba bud ryntih katkum ki kyndon jong ka sorkar India bad ruh ban pynthikna na ka bynta ka jingshnain jong ki jingtrei iing bad ruh ban pynthikna ba kito kiba don ia ki jaka kiba rit kin lah ban pyndonkam kham bun ka jaka namar kham hashwa ki la don ki jingpyrkhing ha kaba iadei bad ka jingpyllait jaka na shakhmat, shadien bad na sha kynriang ia kaba la pynjynsur mynta.”

Nalor kata u CM u la ong ruh ba yn ym aijingbit satia ban shna iing ha ki jaka ba long sharing/riat kumba 50% lane palat, kata da kaba khmih ha kaba iadei bad ka jingshngain jong ki iing ki sem. U la ong ruh ba ki iing kiba don ha ki jaka sharing/riat kumba 40% ne palat ruh ki don ki kyndon bad ki jingpyrkhing, kata da kaba khmih Halor ka kynjang bad ka jingpyndonkam ia ka jaka.

U Conrad u la ong shuh shuh ba ki jingtrei kiba don ia ka kynjang ne height kaba palat 27 mitar ki dei ban ioh ia ka jingbit na ka sorkar.

“Lada ka jingtei kan kynjoh sha ka palat 27 mitar, ki donkam ban ioh ia ka jingbit bad ka jingmynjur na ka sorkar. Kham hashwa la buh 40 mitar hynrei mynta la pynhiar sha ka 27 mitar ka kynjang jong ki jingtrei,” ong u Conrad.

Shuh shuh u Myntri u la ong ruh ba kine ki jingkylla kin iarap shibun ban tehlakam ha kaba iadei bad ki jingpynkhein ia ki ain tei iing tei sem.