Mynjur ka Sorkar ban pynkylla ia ka Meghalaya building byelaws ban pyrkhing tei iing ha Industrial Zone

Syllad | The Rising MeghalayaNovember 6, 2024

Ka Kynhun Myntri ka Sorkar Jylla ha ka 5 tarik u Naiwieng ka la ai ka jingmynjur ia ka Amendment ne ka jingpynkylla thymmai ia ki kyndon jong ka Meghalaya Building Byelaws khnang ban pyrkhing bad teh kyndon halor ki kam tei iing tei sem ha ki Industrial Zone kiba kynthup ha Mawkhanu bad Mawkasiang kiba hap hapoh ka New Shillong Township.

Haba kren sha ki lad pathai khubor hadien ka jingialang, u Myntri Sorkar uba dei ruh u nongaiktien ka Sorkar MDA u Bah Paul Lyngdoh u la ong, “Kane ka amendment ka dei kaba la pynkhreh halor ka jingdonkam ban pyniapher ia ki Industrial Zone ka bym shym la don mynshuwa bad kaba kynthup ia ka amendment jong ka Building Byelaws ia kine ki Industrial Zone”.

“Kumba phi ia tip ba ka jingpynheh kiba jia mynta khamtam ha New Shillong City ka dei kaba hap ban da pyrkhat sani bha ha ka rukom kaba dei, bad dei na kata ka daw ngi donkam ban don ia ki kyndon kiba thymmai jong ka byelaws ia ki Industrial Zone,” u la bynrap.

Haba kylli, u Myntri u la ong ba kine ki kyndon kiba thymmai kin treikam ha ki jaka ba la ithuh kum ki Industrial Estate ha kylleng ki jaka hapoh ka Jylla namar ka jingpynheh ia ki jaka sor ki dei ki kam kiba dang iaid shakhmat na ka por sha ka por.

Kumjuh haba kylli la ka Sorkar ka la ithuh ne em ia ki Industrial Zone ha New Shillong City, u Bah Paul u la ong, “Em, ha ki jaka kum ka Mawkhunu bad Mawkasiang, ngi la don ia ki jaka ba don ki karkhana bad ruh ha ki jaka kiba la dep thied da ka Sorkar Jylla.”