Mynjur ka Sorkar ban thung ia i Kong Iamonlang M Syiem kum ka Chairperson bathymmai ka MSCW

Syllad | The Rising MeghalayaJune 19, 2024

Ka Kynhun Myntri ka Sorkar Jylla ha ka 19 tarik Jylliew ka la ai ka jingmynjur ban thung ia i Kong Iamonlang M Syiem kum ka Chairperson ba thymmai jong ka Meghalaya State Commission for Women (MSCW).

Haba pynpaw sha ki lad pathai khubor, u Myntri ka Tnat Social Welfare u Bah Paul Lyngdoh u la ong, “La thung ia I Kong Iamonlang M Syiem kum ka Chairperson bathymmai ka MSCW lyngba ka jingmynjur da ka Kynhun Myntri ka Sorkar Jylla.

“Ka Kong Iamonlang ka dei kaba la shemphang bha halor ka phang kaba iadei bad ki lad aijingiada halor ki hok jong ki kynthei khynnah bad ka dei ruh ka Chairperson ka Meghalaya State Commission for Protection of Child Rights (MSCPCR),” u la bynrap. Nalor kata i dei ruh i Associate Professor bala shongthait ka Head of Department barim ka tnat Sociology ha St Edmund’s College,

Haba kylli, u Bah Paul u la ong, “Kane kan iarap ban pynkhlain ia ka jingtreikam jong kine ki artylli ki tnat kiba kongsan.Ngi donkam ia ki nongialam kiba ngim shym la ioh ha ki snem kiba la leit noh bad mynta ngi la ioh ia ka briew kaba la shemphang shibun ha ka kaba iadei iadei bad ki lad jingiada na ka bynta ki kynthei khynnah.”

“Halor ka jingkynjoh kaba sha ka rta 65 snem, ka samoi treikam jong i kong Iamonlang M Syiem kum ka Chairperson ka State Commission for Protection of Child’s Rights ka la kut noh ha ka 1 tarik u Lber 2024.Mynta in shimti noh kum ka Chairperson bathymmai ka Meghalaya State Commission for Women da ka jingmynjur jong ka kynhun Myntri,” u la bynrap.

Kumjuh na ka liang u Bah Paul Lyngdoh u pyntip ruh ba ka Kynhun Myntri ka la mynjur ruh ia ka jingtyrwa ban kyntiew ia ka rta ha ka jingthungkam ia ka Chairperson na ka 65 sha ka rta 70 snem.

“Ngi la pan jingtip na ka Tnat Ain bad ngi la ioh ia ki jingai jingmut na kane ka Tnat ha ka kyrdan jong u Advocate General ka Sorkar Meghalaya,” u la ong shuh shuh.