Mynjur ka Sorkar da ka song pisa ia ki nongtrei shwa ban khang khyrdep ia ka MCCL

Syllad | The Rising MeghalayaDecember 10, 2024

Ka Kynhun Myntri ka Sorkar Jylla ha ka 9 tarik Nohprah ka la ai ka jingmynjur halor ka jingthmu ban ai da ka song pisa kaba tang shisien (one-time special plan) sha ki nongtrei jong ka Mawmluh Cherra Cement Limited (MCCL) shibynta jong ka sienjam shwa ban khang khyrdep noh ia ka.

Haba pynbna ia kane hadien ka jingialang, u Myntri Rangbah ka Jylla u Conrad K Sangma u la ong, “Ngi la dep ban pynbeit khatduh bad ai ka jingmynjur halor ka jingthmu ban ai da ka song pisa kaba shisien ai shwa ban khang khyrdep noh ia ka MCCL.”

Da kaba pynpaw ba ka sorkar ka la pynkhreh ia baroh ki sienjam kiba iadei bad ka jingkhang khyrdep noh ia ka MCCL, u Conrad u la ong, “Namar kata ngi la wan ha ryngkat kane ka song kyrpang kum ka jingai khublei khatduh bad ki nongtrei lane ka VRS.”

U la ong ruh ba ia kane ka skhim la mynjur hadien ka jingiamir jingmut kaba sani bha bad ki nongtrei ka MCCL.

“Mynta ka MCCL ha kaba khatduh kan tyrwa ia kane ka song pisa bad kan sa iamir jingmut ruh bad ki seng jong ki nongtrei lem bad kiwei pat bad ban ia soi ia ki kot ki sla khnang ban lah ban pynurlong ia kane ka kam. Mar ia dep yn sa iaid ki sienjam ban khang khyrdep noh ia kane ka karkhana pynmih dewbilat,” ong u Myntri Rangbah.

U la pyntip ruh ba kane ka skhim song pisa ba la mynjur mynta ka sngi yn sa khmih ruh ha kaba iadei bad ki jingsiew kiba dang sah baroh.

Haba kylli u Myntri Rangbah u la ong, “Ngam lah ban iathuh bniah ia ki jingtip kiba bun, hynrei ha ryngkat ki nongtrei bad kiwei kiwei ki jingsiew lada khein kyllum lang kan kot sha kumba T.100 klur. U pyntip ruh ba ki nongtrei ka MCCL ki don palat 250 ngut.

Nalor kata u pyntip ruh ba ka sorkar kan sa die noh ia ki jingdon jingem baroh jong ka MCCL.

Haba kylli halor ka jingpulom halor ka jingtyrwa pyntreikam da ka joint venture ban pynkhie im ia ka MCCL, u Conrad u la ong ba ki laitylli ki kompeni kim shym la lah ban pynbiang ia ki jingdonkam bad ki kyndon ba la buh da ka sorkar Jylla.

“Ngi la iaid bad khot da ka EoI ha kaba ki al don laitylli ki kompeni kiba la wan, hynrei kawei ka kompeni kam shym la lah ban pynbiang ia ki kyndon ba la buh, kawei pat ka la wan bad pynpaw ia ka jingdon mon hynrei ka la shu jah rngai noh katba kawei pat kam shym la lah ban pynbiang ia ki jingdonkam na ka bynta ban lah ban pyniaid shakhmat ia ka kam,” u la bynrap.