Mynjur ka Sorkar ia ka Farmers Empowerment Commission Amendment Bill 2024

Syllad | The Rising MeghalayaAugust 10, 2024

Ka kynhun Myntri ka Sorkar Jylla ha ka 9 tarik mynta u bnai ka la ai ka jingmynjur ia ka Farmers Empowerment Commission Amendment Bill, 2024.

U Myntri ka tnad Pule Puthi u Rakkam A Sangma haba kren sha ki lad pathai khubor u la ong ba kane ka Amendment ka thmu ban kyntiew ia ka rta jong u Chairman na ka 65 sha ka 70 snem rta.

U la pyntip ruh ba ka kynhun Myntri ka la ai ruh ka jingmynjur ia ka Benami Transaction Prohibition Rules, 2024, khnang ban ailad ia ki jingujor ki ban pdiang da ki Deputy Commissioner ha la ki jong ki District.

U Rakkam u la ong ba la ai jingmynjur ruh ia ka Meghalaya Public School Service Rules, 2024 ha kaba baroh ki laitylli ki Public School, Shillong, Tura bad Jowai ki la shah kynthup lang.

“Ha baroh kine ki snem ym shym la don Service rules na ka bynta ki nonghikai bad ki Principal kiba trei ha ki Meghalaya Public School bad ha kiwei kiwei pat ki Public School hapoh ka jylla,” u la bynrap.

Ha kajuh ka por, ka kynhun Myntri ka la ai ruh ka jingmynjur ia ka Meghalaya Subordinate Water Resources Engineering Service Rules, 2024.