Mynjur ka sorkar ia ka IT/ITeS Policy ban plielad ia ki samla ha ka ioh kam ioh jam

Syllad | The Rising MeghalayaMarch 13, 2024

Ka kynhun Myntri ka sorkar Jylla ha ka 12 tarik Lber, ka la mynjur ia ka Meghalaya IT/ITeS Policy ka ban plielad ia ki samla ha ka liang ka ioh kam ioh jam.

Haba kren sha ki lad pathai khubor, u Myntri Rangbah ka Jylla u Conrad K Sangma u la ong, “Kane ka dei kaba iaid ryngkat ryngkat bad ki polisi treikam jong ngi na ka bynta ban lah ban thaw kam thaw jam ha ki IT sector, bad ban pynurlong ia kane ngi la ai ia ki jingmyntoi ne incentive ha kaba ia ki kam kiba la thaw bad pynmih thymmai kaba long T.3000 da ka sorkarJylla bad kane ka long haduh haduh T. 15,000, kata ha ka nongrim jong kiba wan nyngkong.”

“Kumno kino kino ki kompeni ne karkhana kiba wan ban seng ia ki BPO sector ha kane ka jylla, ngin ia ia kane ka song jingiarap ba T.3000 na ka bynta ka kam kaba ki pyniar bad ngi buhthong bad khmih lynti ba ngin lah ban thaw haduh 15000 tylli ki kam lyngba kane ka polisi ai song jingiarap na ka bynta ki IT bad ITES sector,” u la ong.

Ha kajuh ka por u CM u pyntip ruh ba ka sorkar ka tyrwa ruh na ka bynta ban thaw ia ka Meghakaya Technology Park Society, kata nalor ba ka Jylla ka la dep don lypa kawei ka Technology Park.

Nalor kata u la ong ba ka phase kaba ar jong ka technology park ha Shillong ka la iaid shakhmat bad shen yn lah ban pyndep noh kat haduh une u bnai Iaiong 2025. U la ong ba ka IT park kaba lai kan sa wan hapoh Tura, West Garo Hills District.

“Ia ka work order na ka bynta kane la dep ban aiti hynne ka sngi ba Ar bad ngi khmih lynti ba kane ka kam kan sdang noh, bad kumta ngi sngew ba ka long kaba donkam ban don ia ka Society ka ban khmih bad pyniaid ia kine ki Technology Park ha ka rukom kaba dei bad kumta ruh ngi la thaw ia ka Meghalaya Technology Park Society,” ong shuh shuh u CM.