Mynjur ka sorkar ia ka Meghalaya Power Policy 2024 ban pynkhlain ia ka jingpynmih bording

Syllad | The Rising MeghalayaFebruary 27, 2024

Ka kynhun Myntri ka Jylla ha ka 26 tarik Rymphang, ka la mynjur ia ka Draft Meghalaya Power Policy, 2024, kaba thmu ban plie lynti na ka bynta ban kyntiew ia ka kam pynmih bording lyngba ka hydro, thermal, pumped storage, solar, wind bad kiwei kiwei ha ka rukom kaba janai bad kaba neh.

Haba kren sha ki lad pathai khubor hadien ka jingialang, u Myntri ka Tnat Bording u Abu Taher Mondal u la ong, “Ngi la iamir jingmut sani bha ha kaba iadei bad kane ka Power Policy bad na ka liang ka sorkar ka la ai ka jingmynjur ia kane ka policy kaba thymmai.”

U la pyntip ba ka power policy kaba rim ka dei kaba la don u snem 2010. “Khatsaw tylli ki snem ki la iaid bad ka la don ka jingkylla kaba khraw ha ka jinglong jingman ha ka liang ka kam bording, bad kumta ngi la donkam ia ka power policy kaba thymmai,” bynrap u Myntri.

Kane ka policy ka pynpaw ruh halor ka jingdonkam ban kyntiew ia ki kam pynmih bording na ka sngi, ka lyer bad kiwei pat da kaba khmih ruh halor ki bynta ki ban ym ktah ia ka mariang da kaba bud beit ryntih ia ki jingdonkam jong ka Ministry of Environment, Forest and Climate Change ka sorkar India.

Nalor kata u la ong ba kane ka policy thymmai kan pynshlur ruh ia ki kompeni ba kin wan sha ka Jylla khnang ba kin lah ban pyntrei ia ki project pynmih bording ha kane ka jylla.

Kane ka policy ka thmu ruh ban pynbha bad kyntiew ia ka rukom treikam jong ki tnat bording kiba la don lypa khnang ban lah ban pynbit pynbiang ha ki kam sam bording, ban pynsuk ia ki paidbah ha kaba iadei bad ka rukom siew ia ki bill, ki jingujor bad kiwei pat ki bynta jong ki jingtreikam kiba iadei bad ka bording.

Ka jingthmu ba kongsan jong kane ka policy ka long halor ka jingpyntreikam ia ka Pumped Hydro Power ha ka jylla, ban khring ia ki kynhun Seng kam shimet, ban kyntiew ia ka jingpynmih khajna ia ka sorkar bad ban kyntiew ia ka ioh ka kot ka jylla.

Ka Jylla, ka don iaka lad ban pynmih bording kumba 3000 MW, hynrei la lah ban pynmih tang 378 MW bad 3 MW ka dei kaba dang iaid ka jingtrei kaba la pyntrei da ka State Power Generation Corporation Limited

Nalor kata u Myntri u la ong ruh ba kane ka policy ka thmu ruh ban wanrah ia ka thermal power project kaba lah ban pynmih bording haduh 250 MW.

Katkum kane ka policy la ong ruh ba ka don ka jingkiew ha ka jingpynmih bording lyngba ka lyer ne wind power project ha baroh kawei ka ri ha kaba ki jingtreikam lyngba kine ki projek ka la kynjoh sha ka 44.73 GW ha u bnai Nohprah 2023.