Mynjur ka sorkar ia ka project pynmih Pepsi ka ban kot T.300 klur ha Mendipathar

Syllad | The Rising MeghalayaJuly 20, 2024

Ka kynhun Myntri ka sorkar Jylla ha ka 19 tarik mynta u bnai ka la ai ka jingmynjur na ka bynta ban pyntreikam ia ka project pynmih Pepsi ka ban kot haduh T.300 klur ha Mendipathar Industrial Area, North Garo Hills District.

Haba kren sha ki lad pathai khubor, u Myntri Rangbah ka Jylla u Conrad K Sangma u la ong, “Kane ka jingtywa ba la mynjur ka long ban pyntreikam ia ka project Pepsi ka ban kot sha ka T.200 klur ia kaba yn pyniaid da ka Varun Beverages Limited bad T.100 klur ia ka kompeni Food Pulp and Fruit Juice kaba long katkum ka Industrial Investment Policy 2024.”

“Kumta halor kane ka bynta ngi la rai ia ka jingkyrshan jong ngi ia kane ka jingpynshlur ba la pynbeit kyrpang katkum ka polisi jong ka sorkar jylla bad ha kane, ka pisa kaba haduh 30% kham bun ka jingiarap ia ki jingbei tyngka kaba ki la pan palat ia kaba ju ai. Kawei pat ka jingpynrung ka pisa kaba 30% tam la pynrung ha kata ka jingai jingiarap pisa.

Kumta ka T.7.5 klur ka dei ka jingai jingiarap pisa bad la tyrwa ban pyndap T.5 klur ha kaba ka jingdawa na ka kompeni ka long kumba jan haduh T.40 klur ka jingbei tyngka kaba ki la pan, hynrei la pynduna sha ka T.5 klur, ” bynrap u CM.

Haba pynpaw ba ka sorkar ka la mynjur ban ai jingiarap 2% ia ka sut, u CM u la ong, “Ha kajuh ka por ka pisa GST kaba don hangta kaba thikna ka don ka jingsiew biang ïa ka GST ka iahap bad ka skhim UNNATI bad kumjuh ruh bad ka skhim na kiwei pat ki sorkar jylla ha kaba la pan ia ka jingsiew bai lutksan kumba 300%. Ngi la pynduna ia kata bad ngi la mynjur ia ka jingbei tyngka ne jingphah biang kaba 200% na ka jingmih ka khajna SGST, ha kiwei pat ki jylla ka jingbun ka kiew haduh wat 300%, kumta ngi la thied ia ka haduh 200%.”

Nalor kata u CM u la pyntip ba ka sorkar ka la buh ia ka kyndon ba 90% ki nongtrei ki bym dei ki nongpyniaid ki dei ban long ki trai shnong. U la ong ruh ba la khmih lynti ba kane ka karkhana kan lah ban ai kam ai jam ia kumba 500 ngut ki nongshong shnong jong ka thain.