Mynjur ka Sorkar ia ka skhim ba T.2 lak ia ki DTF ban lah pyntreikam ia ka MRSSA

Syllad | The Rising MeghalayaOctober 18, 2024

Ka Kynhun Myntri ha ka 18 tarik Risaw ka la ai ka jingmynjur ia ka skhim ka ban ai ia ka jingiarap song pisa kaba mar T. 2 lak sha ki District Task Force (DTF) na ka bynta ban pyntreikam ia ka Meghalaya Residents Safety and Security Act (MRSSA), 2016 ha ka Jylla.

Haba kren sha ki lad pathai khubor hadien ka jingialang, ka Myntri ba khmih ia ka Tnad Ain, ka Kong Ampareen Lyngdoh ka la ong ba ka Sorkar ka donkam ban wanrah ia kane ka skhim na ka bynta ban lah ban pyntreikam ia ka MRSSA.

“Kane ka skhim ka kynthup ha ka jingpynbiang katkum ki kyndon ha kaba ki DC kin ioh ia ka mang tyngka khnang ba ki kam ki jam bad ka jingkhmih halor ka jingpyntreikam ia ka MRSSA kan sdang noh kham kloi. Kumta ruh ngi la rai ban pynioh ia ka song pisa kaba T.2 lak kawei ka district. Ha ki district ki donkam ia ka mang tyngka kaba kham heh namar ka jingdon bun ki bor ba dei khmih kum ki Dorbar ki ban sa iarap ban khmih halor ka jingwan rung ki briew kiba na bar,” ong ka Myntri.

U Secretary ba khmih ia ka Tnad Ain bad Parliamentary Affairs, u Bah Cyril Diengdoh u la ong ba ki DTF ki dei kiba la ioh ia ka bor ban khmih bad pynshisha ia ki nongshongwai katkum ki kyndon jong ka MRSSA.

“Hapoh kane ka kyndon, phi donkam pisa na ka bynta ki laptop, computer bad halor ka jingdonkam internent. Ka DTF ka don ruh ia ki dkhot ki bym dei ki briew sorkar ia kiba ngi hap ban siew na ka bynta ka jingshim bynta ha ki jingialang, TA/DA bad kiwei kiwei pat ki jingdonkam. Kiba bun na ki Rangbah Shnong ki la pan ia ki laptop bad computer khnang ba kin lah ban pynrung ia ki kyrteng ia ki trai iing bad ki nongshongwai hapoh ki shnong ki thaw ki jong ki,” u la ong.

Katkum ka jingpynpaw ka jong u, kiba bun ki nongshong shnong ha sor Shillong ki la sdang ia ka project kum ka jingpyrshang ban sdang pyntreikam ia ka MRSSA da kaba pynrung ia ki jingtip baroh shaphang ki trai iing bad ki nongshongwai ha la ki jong ki pud ki sam.

“Hynrei, ki la iakynduh jingeh namar ka dei ka online database. Balei ka online, ka daw ka long namar kaba hap ban iasam jingtip lang bad ki bor pulit bad ki DTF, bad dei na kata ka daw ba la shna ia kane ka online database ha ka portal. Kumta ban lah ban pyntreikam kham bha bad ban pynthikna ba ia kane ka ain yn pyntreikam ha ka rukom kaba ka dei ban long katkum ka ain, ka sorkar ka la wanrah ia ka skhim kaba T.2 lak na ka bynta kawei ka DTF bad kito ki district kiba donkam kham bun kin ioh kham bun khnang ba ki lah ban pynlut na ka bynta ki laptop, ki computer, ka bai shong jong ki dkhot bym dei ki briew sorkar bad kiwei kiwei na ka bynta ban pyntreikam ia ka MRSSA,” bynrap u Bah Cyril.